【酒燒火焰德國豬手】February

一年入面你最鍾意邊個月份呢?小編就最鍾意二月啦!因為二月又多節日,又少咁兩三日,硬係覺得過得特別爽!小編知道觀塘有間餐廳叫February,一樣係想延續二月開心嘅氣氛。喺度除咗有德國風味好野食,仲有靚酒飲,一齊去睇睇!

KCW_4386
店內所有櫈都係梳化,而且燈光柔和,坐落令人覺得好舒服。加上店員態度友善親切,一班朋友過嚟坐低飲野、食野、吹水就最好不過!

德國火焰咸豬手-2
中秋節唔想熱辣辣出街玩火,可以涼住冷氣,舒舒服服咁試下德國火焰鹹豬手(HKD282) 。店員會親自喺你面前淋上冧酒再點火,火焰會燃燒5-10秒左右㗎!又有得食又有得睇!豬手外皮燒到卜卜脆,食落唔會好鹹,肉質嫩滑唔老,仲帶有少少酒香。另外仲可以加埋芥末醬增加鮮味,醬汁味道甜甜地唔太辣,唔食得辣嘅小編直情「想點就點」!伴碟仲有酸菜比大家開開胃,唔駛淨係食肉咁dry!

西班牙頂級黑毛豬鞍架配蕃茄茸-1
唔夠喉可以試埋西班牙頂級黑毛豬鞍架配蕃茄茸(HKD182) 。豬鞍架外層金黃香脆,內裡鮮嫩軟腍。完全唔駛怕好似一般咁豬扒食到有渣,切落去就知道好爽身,又爆juicy!加埋蕃茄茸就更醒胃!

西西里海蝦意粉-1
西西里大虎蝦意粉(HKD152) ,以新鮮蕃茄煮成既西西里汁,酸酸甜甜,加上大虎蝦夠晒鮮甜,真係令人食指大動!意粉口感彈牙,外層軟內裡唔係腍晒,食落有種啖啖都彈牙嘅感覺!

黑松露忌廉什菌意大利飯配香烤大啡菇-1
諗諗下,好多一般西餐廳都有意大利飯,但依款黑松露忌廉什菌意大利飯配香烤大啡菇(HKD122) 就唔同喇。佢特別之處就係用嘅大啡菇比一般冬菇味道更為濃郁。黑松露,啡菇同忌廉汁嘅精華,落晒喺一粒粒嘅米飯入面,完全吸收晒,食落口感軟滑香濃而唔黏稠。咀嚼過後,松露嘅味道仲會繼續留喺口腔,久久未散,可以慢慢回味。

德國腸拼盤(7pc)
食腸識食一定食外國腸,因為質素一定有保證,德國腸拼盤(HKD132) 就可以比你一次過試曬唔同類型既腸!食落唔止香口仲好爽口,加上芥末醬更加惹味!當然,酸菜係德國菜中必備配菜,可以中和腸仔juicy之中嘅油膩感。

HOEGARRDEN ROSEE
HOEGARRDEN ROSE(HKD92) 外表粉紅色飲落啖啖清新玫瑰味,仲甜甜地,非常適合女士飲用。同場仲有好多唔同種類嘅酒比大家選擇㗎。

February
地址:觀塘駿業街56號中海日升中心2樓A號舖
電話:2237 1119
營業時間:星期一至六: 11:30a.m.-11:30p.m. 星期日:休息

You may also like...

Leave a Reply

Your email address will not be published. Required fields are marked *