【大推!旺角隱世Cafe】Infinity Workshop Cafe

出到旺角人煙稠密,大動作少少郁下都怕撞到人,想行條直線都要左閃右避……搵到間餐廳食飯,想安安樂樂慢慢食,又有好多人等位,唔好意思留得耐。唔通旺角真係無地方可以舒舒服服靜靜地食飯嘅?小編推介位於旺角登打士廣場嘅Infinity Workshop Cafe,地方夠晒大,空間感十足。啱晒行街被人迫到抖唔到氣嘅你上嚟抖抖氣,嘆返下!而且小店仲可以租借場地俾熱愛創作或者藝術相關嘅朋友仔作教學用途,如果你對手工藝教學有興趣都可以租場地做教室用途㗎!

interior2
小店地方寬敞,燈光柔和,半邊餐廳嘅檯凳比較高身,係為咗方便租借場地用作教手工藝或者教甜品製作嘅朋友,可以清楚示範自己嘅手藝,非常體貼。餐廳整體裝潢都比較簡約,檯凳唔會放得太過擠迫,方便隨時可以變身「教室」。注重私隱,唔鍾意比隔離檯「竊聽」嘅朋友一定會覺得好舒服!
dsc_4888-1

蜜糖雞翼(HKD68)一客總共有6隻,全部都已經開邊半隻半隻上,食嘅時候好方便。蜜糖唔係一早淋喺上面,而係另外再用碟仔附上,所以雞翼脆皮嘅口感完全無受影響,大家亦可以根據自己喜好蘸上適合自己份量嘅蜜糖。雞翼本身帶有少少鹹香,就算係唔鍾意食甜嘅朋友去點一份雞翼share都會適合㗎!
dsc_4541

黑松露迷一定要試試呢款黑松露油炒鮮帶子虎蝦意粉(HKD108)!一出場已經散發住超濃郁嘅黑松露香味!意粉質感比較爽身彈牙,加埋爽口野菌口感更豐富。大大隻虎蝦食落好實肉又鮮甜,三隻帶子都實肉爽甜,鮮味滿分,加埋黑松露香味,令整體味道更獨特香濃。

dsc_4278
飲品方面,必check小店自創童話系列飲品,一共有七杯,分別以唔同童話故事嘅女角為題,包保大家瞬間少女心大爆發!呢杯顏色好迷人嘅係艾利奧(HKD49),喺柔柔Tiffany Blue之海入面,係清甜嘅青蘋果味,睇完之後你會唔會諗起人魚公主呢?另外六杯飲品嘅女角仲有小紅帽茉莉睡美人貝兒白雪公主,連黑魔后都有呀!今次真係要嗌晒成班朋友仔出嚟試晒佢先得啦!

dsc_4691
軟滑橙酒梳乎厘(HKD78)
外層灑上咗糖霜,白雪雪一層,配上新鮮藍莓同香橙裝飾。梳乎厘口感夠晒梳乎,入口有少少似雪糕,食落仲會滲出微微酒香同香橙味道,十分特別,可以一試。

dsc_4767
Haagen-Dazs雪糕心太軟(HKD98)心太軟最好味就係冷暖交融,朱古力醬加上凍冰冰嘅雪糕,入口軟滑。呢個心太軟除咗做到呢一點之外,朱古力蛋糕外層帶少少彈性,入口軟綿綿。一切落去,裡面嘅朱古力醬慢慢流出嚟,加埋雪糕同生果一齊食,真係多重享受呀!

Infinity Workshop Cafe
地址:旺角登打士街43H號登打士廣場5樓全層
電話:3956 9117/6349 9278
營業時間:星期一至日:13:00-00:00

You may also like...

Leave a Reply

Your email address will not be published. Required fields are marked *