【雪雪聲滋味將軍拉麵!】武士拉麵

講起尖沙咀金巴利街一帶,大家可能會標簽係韓國街,但喺佈滿韓式餐廳嘅街道中有間以日本武士命名嘅日式拉麵餐廳,真係萬綠叢中一點紅,格外醒目!武士拉麵嘅每一碗拉麵都以日本將軍命名,而且都係最出名嘅將軍,每個將軍代表著唔同口味湯底,咁神秘?!小編都忍唔住去同將軍會面。

OLYMPUS DIGITAL CAMERA

傳統日式拉麵小店裝潢,由門簾已經感受到濃郁日本風,店内武士裝飾擺設更加係獨具一格,深信老闆對日本武士熱愛程度一定唔低。另外小店雖然唔大,但服務夠周到,牆上嘅衣架係提供俾客人掛外套衣服。

OLYMPUS DIGITAL CAMERA

武士拉麵嘅湯底可以話係小店嘅生招牌,豬骨湯底係每日新鮮豬骨文火煲8個鐘,骨膠原都出曬嚟啦。湯底仲加咗魚介,魚介由六款唔同類型魚乾熬製,再加入雞骨及蔬菜等材料煮十幾個鐘而成。德川將軍拉麵(HKD88)就有齊呢兩種味道。香濃豬骨湯底,濃而不膩,帶有清甜魚香。日本空運過嚟嘅叉燒肥瘦均勻,原來餐廳有精心挑選過再加上特製醬汁微烤,所以更加入味。

OLYMPUS DIGITAL CAMERA

食唔慣重口味嘅可以試下呢個豐臣將軍拉麵(HKD98),一上檯香蔥味已經撲鼻而來,湯底並無想象中油膩,反而好清香。拉麵口感煙靭彈牙,小編「雪雪聲」就食曬碗拉麵,再飲啖麵湯落肚,香濃味道從舌尖一直傳到胃度,簡直「一級棒」ichiban!

OLYMPUS DIGITAL CAMERA

食拉麵點少得溏心蛋(HKD10),褐色外皮,半凝固嘅黃蛋極具誘惑,小編都忍唔住咬一啖,滿口嘅香濃嫩滑,每一口都幸福感爆棚!

武士拉麵
地址:尖沙咀柯士甸路15號柯士甸大廈B座地下
電話:2369 3211
營業時間:星期一至日:12:00-15:00;18:00-22:30

You may also like...

Leave a Reply

Your email address will not be published. Required fields are marked *