【食得鮮、飲得chill 尖沙咀絕品串燒】喜膳燒

串燒既可以食到食材鮮味,又可以體驗到燒烤風味,仲好適合同朋友飲返幾杯傾下計,難怪咁多港人都鍾意!尖沙咀寶勒巷新開一間串燒店喜膳燒,新鮮嘅食材同埋舒適嘅環境,一定滿足到你食得鮮、飲得chill,仲可以休息一下嘅需求。

食串燒最怕就係凍冰冰,所以餐廳非常體貼,用特製石板上菜,保持食物嘅溫度,等大家可以慢慢邊食邊飲!泰式燒原隻魷魚(HKD78)魷魚燒到啱啱好,口感彈牙爽身,同時仲有燒過嘅輕輕柔韌口感。配埋泰式醬汁酸酸甜甜,比起汁燒魷魚黏黏甜甜嘅更加能夠襯托出魷魚獨有嘅淡淡甜味,好值得一試!

燒特大扇貝(HKD65)扇貝迷一定大滿足!因為特大扇貝唔單止夠大隻,入口有厚重感,仲超級鮮甜!只係用少少蒜蓉調味就已經夠晒鮮味,仲有得揀辣定唔辣添!食完仲想一再回味,一個人食兩件(HKD120/2件)都唔會過分!

燒美國珍寶生蠔(HKD60)蠔身肥大肉厚,海水味唔會太重,蠔肉鮮甜,鹹甜比例啱啱好。驚喜位係帶子位唔會韌,仲爽脆彈牙添呀!
蔬菜類有必食燒超甜金菠蘿(HKD25),燒完之後菠蘿好重果香,啖啖都有香濃菠蘿汁!燒蜜糖牛油粟米(HKD18)食落又脆又甜,粒粒都爆脆!仲有海鹽燒秋葵(HKD28),清新爽脆又健康!

燒完串燒飲返杯養生鮮果水(HKD45)就夠晒清涼,入面有多種水果,飲完喉嚨即刻覺得好舒服!仲可以慢慢食入面爽脆嘅水果,享受串燒之外嘅清甜果香。

喜膳燒
地址:尖沙咀寶勒巷10號地舖
電話:3468 2234
營業時間:星期一至日:18:00-02:30

You may also like...

Leave a Reply

Your email address will not be published. Required fields are marked *