【林村新春嘉年華 許願、掃食、行大運!】香港許願節 2017

香港許願節,今年踏入第七年。大會特別加設新項目,添加唔少熱鬧氣氛。大家除咗可以喺林村許願樹拋寶牒許願、燃點蓮花燈祈福之外,仲可以食到多款特色美食,行下睇下本地創作品牌市集攤位同埋參加首個港式花牌設計比賽添!新春嘉年華活動由1月28日至2月12日,又係一家大細齊齊出動嘅時候啦!

今年美食專區一共有20個唔同特色美食攤位,大家可以食到飽一飽。

燒金蠔(HKD40)大大隻蠔燒至金黃色,搽上蜜糖,除咗會中和金蠔本身嘅鹹味,入口鮮味仲會係口腔中縈繞。

另外有好受小朋友歡迎嘅雞翼包飯(HKD40) 雞翼外皮燒到卜卜脆,内有乾坤釀入糯米飯,嫩而不膩。

過年咩都要好意頭,富貴黃金蝦就啱晒啦!一盒有4條炸蝦,外層沾上麵包粉,令黃金蝦棒脆口度大大提升。

同多士1:1大嘅法式煎鵝肝(HKD80)都係第一次見,鵝肝本身油份高,所以攤檔煎呢個鵝肝無再落太多油。店員喺鐵板上煎至兩面金黃,色澤均勻,再加上黑松露就大功告成。小編迫不及待試一啖,口感柔軟綿密,香濃嘅鵝肝逐漸散發口腔,讚!

食咗咁多炸物開始覺得口乾啦,食個鐵板炒雪糕涼下先。雪糕味道有木瓜、香蕉、香芋同雜莓可以揀,同時可以加配料一齊炒,配料方面有獨創嘅麥維他,仲有較受歡迎嘅Oreo。

嚟到呢度,連長洲平記糯米糍(HKD12)都有得食!有芒果、榴蓮、奇異果、花生幾款口味選擇,小編望住皮薄餡多嘅芒果糯米糍已經忍唔到口啦。口感軟糯,裏面厚實嘅芒果肉好滿足啊!

食飽飽可以嚟港式花牌工作坊,買個花牌DIY包(HKD100)製作屬於自己個人設計嘅花牌, 順便可以參加埋首個港式迷你花牌設計比賽,有機會被揀中之後做展覽㗎!

場內設置兩個大型吹氣城堡,一個係專為小朋友而設嘅大型吹氣順風順水順風梯,另一款係為新春期間設計嘅大型吹氣步步高陞鴻運山,參加者可攀爬到山頂,敲起大鐘,寓意來年萬事如意。另外,年初十至年十六場內將設置漫花飛舞水晶球及桃花樹路,打造一個浪漫元宵佳節。

每逢新年,唔少人都會到林村許願樹拋寶牒許願,大家都可以到祈福許願繪馬,寫翻個許願牌 (HKD30),為家人或者朋友祈福許願。

小編都寫下祝福語,祝自己同大家都可以喺雞年繼續食到太飽喇!

香港許願節 2017 林村新春嘉年華
日期:2017年1月28日至2月12日(年初一至年十六)
時間:9:00-18:00
地點:大埔林村許願廣場

 

You may also like...

Leave a Reply

Your email address will not be published. Required fields are marked *