【無敵大海景!細味豐盛法國佳餚】EL Dining

小編覺得真正嘅奢侈,係你擁有嘅時候無由衷珍惜同感受,任由你所擁有嘅一切慢慢咁消逝。當你唔去珍惜嘅時候,即使只係簡單一碗公仔麵,又或者幾高級嘅佳餚,都只會係浪費,浪費就係真正嘅奢侈……位於銅鑼灣嘅EL Dining,提供非常舒適環境同美饌,令你可以無拘無束盡情享受用餐時光,實實在在感受當下。


餐廳位於商業大廈9樓,裝潢舒適,仲可以眺望維港景色。比你喺優雅嘅環境盡情享受豐盛餐點,最適合喺度慶祝紀念日或者同朋友談心。


套餐可選2個前菜1個主菜,仲會包埋甜品(HKD398)前菜Pan-Fried Crab Cake w/ Mango Salsa,蟹餅由蟹肉,雜菜同香草組成。入口感受到蟹肉一絲一絲,口感極之豐富。再仲配埋新鮮芒果沙律,酸酸甜甜,加添一分清爽感覺。

Prawn Spaghetti w/Garlic and Chili,賣相非常討好。蝦肉雪白彈牙,食落微辣。意粉帶有少少煙韌質感,唔會過腍,配上京蔥絲同燈籠椒嘅絲更顯得香口開胃!作為前菜最適合不過。

主菜有5款選擇,其中Signature Pan-fried Black Iberico Pork chop選用西班牙黑毛豬,豬肉香氣濃郁,肉質嫩滑配上Gravy Sauce,更顯風味。加上焗薯同香草散發郁香,感覺更香口。
 Slow Cooked Rack of Lamb採用澳洲羊配以蜜糖芥末醬,大廚會先將羊肉慢煮45分鐘再煎香羊肉表層,大概7成熟,以保持羊肉嫩滑同時又可以確保肉汁豐富,唔會流失。食落羊肉唔羶亦唔韌,甜甜辣辣非常惹味!可能係慢煮嘅關係,羊肉呈粉紅色,感覺鮮嫩,唔會全塊啡色。

Braised Beef Cheek坊間食到嘅牛面頰大多數都係燴,但係呢道牛面頰經過慢煮48小時,質感有少少似牛展。超綿密柔滑嘅薯蓉牛油忌廉味道香濃,配上Gravy汁,味道偏甜。餐廳所有菜式伴碟顏色豐富,其實都係用新鮮蔬果打成蓉再加食用花作伴碟,十分有心思又健康。

提提你,3月上旬開始,餐廳會推出set lunch,大家去之前記得book檯呀!甜品仲可以要求寫message㗎,想比驚喜人就要留意啦!

EL Dining
地址:銅鑼灣告士打道230號宇宙商業大廈9樓
電話:2889 4018
營業時間:星期一至日:12:00-15:00/18:00-00:00

You may also like...

Leave a Reply

Your email address will not be published. Required fields are marked *