【180 ゚視野海景 親民價豪食生蠔自助餐】Anchor’s Seafood & Beer House

想瘋狂食生蠔?位於荃灣嘅Anchor’s Seafood & Beer House推出任食生蠔自助晚及早午餐,生蠔無限放送,源源不絕咁供應!同場仲有超多海鮮同美食選擇,一望出去仲有青馬大橋海景可以睇到,想無限食海鮮或者想睇靚景就一定要留意佢地嘅自助餐啦!

嚟到Anchor’s 會為每位顧客提供1杯餐酒、啤酒或汽水,一坐低就即刻會問你需要嘅飲品,然後即刻送到。  
自助餐所供應嘅生蠔全部都係嚟自法國夏朗德嘅優質芬大奇生蠔,空運到港,確保新鮮。專人即場剝開生蠔,整個剝殼過程都喺你眼前呈現,都算乾淨令人有信心。生蠔唔算大隻肥厚,勝在都算海水味重,入口唔會腥。一次拎到兩隻,如果真係好鍾意食生蠔,呢個份量就要行多幾次先得啦!

自助餐當然唔少得壽司同刺身,呢度都算款式多,而且補充好快,幾乎唔會出現無貨嘅情況。以自助餐計,壽司質素平平。刺身之中以三文魚刺身最抵食,厚身新鮮,係咁多款魚生之中小編最為推介。另外,仲有長腳蟹、翡翠螺、青口、蝦等等海鮮無限任拎,不過都係一般自助餐質素,唔可以期望太高,食落未至於肥美鮮甜,感覺還可以。

除咗海鮮之外,現場仲有專人會為你即切牛扒。小編用黑椒汁配上,感覺牛肉邊緣略嫌有啲韌,但係內裡都算嫩滑,味道濃郁,口感豐腴。

現場仲有多種芝士同火腿供應,選擇非常多,無論濃或淡口味都齊備。

食親自助餐身邊總會有人怕生冷野,呢度有熱辣辣湯粉供應,就算成班人嚟到有人唔食海鮮都唔怕。扎肉食落還可以,魚片、生菜同米線都唔錯。嚟到勝在有靚景睇,一路睇住青馬大橋夜景,一路食,感覺浪漫。


甜品方面都算多款,細細件好精緻,啱晒女仔同相機胃口,樣樣拎一件仔返去,樣樣食少少,已經好滿足!

雪糕仲有Dreyer’s開心果、藍莓芝士同芒果三種口味選擇,無限定一人一杯,食完仲可以拎多杯食添!
同親朋好友一齊睇靚景,下面就係價錢啦。

星期一至四晚餐成人每位港幣298.5元,小童每位港幣149.3元(原價港幣398元/成人; 199元/小童)
星期五至日晚餐成人每位港幣328.5元,小童每位港幣164.3元(原價港幣438元/成人; 219元/小童)
周日早午餐成人每位港幣292.6元,小童每位港幣146.3元(原價港幣418元/成人; 209元/小童)

Anchor’s Seafood & Beer House
地址:荃灣油柑頭青山公路汀九段123號汀蘭居地下
電話:2945 1138
營業時間:星期一至日: 07:00-22:30

You may also like...

Leave a Reply

Your email address will not be published. Required fields are marked *