【第二屆Taste of Hong Kong 頂尖食府大集匯】Taste of Hong Kong

嚟到3月中,咁多位吃貨最開心梗係第二屆《Taste of Hong Kong》正式開鑼啦!3月16日至3月19日,一連4日都會喺中環新海濱舉行,成為大家食好西又一熱點!除咗上年有份參與嘅本地餐廳Amber、Arcane同天龍軒,今年都有唔少頂尖食府加入,包括:Mercato、Rhoda同ZUMA。入到去間間都係頂尖食府,可以食盡佢地超過50道嘅招牌菜!
一個一個白色帳篷,行到埋去就會見到有唔同野食,個個都好有特色,有得飲又有得食!

除咗有得飲飲食食,行到攰攰地仲可以聽下歌,水準好高㗎!

AMBER一共有四道菜,呢個宮崎和牛配九州醃紫椰菜及海帶沙律佐以椒苺法式醬(HKD280)就係其中一道。拎上手覺得好靚差啲唔捨得食!除咗外型會令人融化之外,和牛入口即融又軟滑,真係好高級享受!

另一個AMBER之選有恵比寿生蠔配梅子、甜菜頭冰沙及黑胡椒(HKD120),以冰鎮住肥美生蠔,再喺上面配埋梅子粒粒,整個配搭勁有日式感覺!再配埋個樣疑似蟹籽嘅甜菜頭冰沙,酸酸地嘅入口更覺得生蠔鮮甜。

TOSCA--八爪魚.檸檬蛋黃醬.莞茜沙律 (HKD60),八爪魚好新鮮,入口彈下彈下但係唔會韌。配埋檸檬蛋黃醬同莞茜沙律更加將鮮味昇華,超鮮甜!

鍾意食海鮮一定要試埋呢個CAFÉ GRAY DELUXE--法國帶子, XO汁,意大利檸檬(HKD160),鮮甜嘅帶子味道配檸檬好突顯鮮甜味道,加埋XO汁仲多咗幾分惹味,甜中帶辣,味道獨特!


天龍軒--蜜燒西班牙黑豚肉叉燒(HKD90),用咗西班牙黑豚肉,所以叉燒口感特別爽口,蜜汁滲入豚肉非常入味,真係甜到漏!


食到尾聲梗係要食返個甜品先夠圓滿。TOSCA--意大利芝士蛋糕(HKD60),入口感覺好柔滑,又唔會太苦、太甜,鍾意Tiramisù嘅朋友點忍到口!

成個event嘅美食真係視覺同味覺大衝擊!世界級水準嘅菜式都只係幾十至二百零蚊,真係好值得,完全搵唔到理由唔去!

第二屆Taste of Hong Kong
日期:2017年3月16至19日
地點:中環新海濱
門票價格:一般門票HKD138起;VIP門票HKD598起。另設有家庭門票及團體預訂折扣。
更多門票資料:Taste of Hong Kong 2017 

You may also like...

Leave a Reply

Your email address will not be published. Required fields are marked *