【掌上名豬 極上北海道豚肉宴】掌壽司

工廠大廈集中地嘅觀塘,近年逐漸發展成爲商業區,喺呢度返工嘅人不斷增加。好多餐廳更選擇喺工廈樓上開,位於觀塘駱駝漆大廈嘅掌壽司日本料理餐廳,可以話係呢棟大廈首批進駐嘅餐廳,至今已經開業4年,能夠立足多年,可想而知餐廳食物有一定水準。餐廳非常著重同客人交流,聽取客人意見,從中改善更不時推出新菜式,務求帶俾客人新鮮感。

餐廳地方寬敞,環境優雅,牆上更有一排排日本Sake做裝飾,最適合想搵個舒適環境食餐飯嘅朋友。

呢個四元豚肉就係新菜式之一,餐廳特別由北海道農場嚴選呢種豚肉直運入港,豚肉由四種唔同日本優質豬混種而成,色澤飽滿且口感更香脆,肉味濃郁。

四元豚肉鍋(HKD398)涮涮鍋選用長崎豬骨湯底,味道清淡又鮮甜,火鍋鋪滿大量野菜同菇類,配上四元豚肉,真係會涮唔停啦。

話明日本料理餐廳點少得刺身,極上刺身盛(HKD698)會因應季節而定,嚴選新鮮食材,分別由日本東京築地、本洲及九洲空運過嚟。刺身盛分別有鷹羽鯛、馬糞海膽、赤貝、三文魚腩、油甘魚、赤蝦、象拔蚌同帶子,海鮮種類多,重點係夠新鮮。海膽甘香,赤蝦大隻又好鮮甜,每款刺身都係厚切,三文魚腩更入口即溶,好滿足。成盤刺身無可挑剔,真係物超所值!

除咗刺身,壽司都好值得一試。時令壽司盛(HKD298)左上分別係:火灸鹿兒島和牛、加拿大海膽、赤蝦同火灸帶子;左下:鰻魚、火灸左口魚邊、火灸八角同火灸三文魚腩。所有海鮮每個星期由日本直運,新鮮時令食材,味道就係唔同。雖然食物種類不算多,但勝在用料新鮮,又會迎合港人口味,先可以得到熟客嘅長期支持。

掌壽司
地址:觀塘開源道60號駱駝漆大廈3座5樓U室
電話:2151 1440
營業時間:星期一至五: 11:45-15:00; 18:00-22:30 星期六至日及公眾假期: 12:30-22:30

You may also like...

Leave a Reply

Your email address will not be published. Required fields are marked *