【嚴重選擇困難 半自助餐回本無難度】帝景酒店 ROYAL VIEW HOTEL

聽日又放假啦!仲未諗到點樣過?小編有好介紹。位於荃灣嘅帝景酒店,最近新推出歐陸式半自助晚餐。除咗有9款多國美味主食,仲有多款前菜、小食、甜品無限供應,一於約齊家人朋友嘆住靚景細嚐與別不同嘅味覺享受。小編八達通話你知,荃灣地鐵站附近有shuttle bus可以直接到酒店,十分方便。

餐廳裝潢以暖色調吊燈加大理石餐桌,猶如進入一個富麗堂皇嘅宮殿。品嚐美食最緊要坐得舒適,餐廳坐位夠曬寬闊,坐喺靠窗位仲可以望到海景。

為食小編係貪心嘅,9款主食都想逐一試下。呢道西班牙辣肉腸燒鱈魚柳相當開胃,以新鮮茄蓉、白蔥及黑水欖燴煮,再淋上檸檬蒜蓉欖油,鱈魚柳肉質幼細且口感肥美滑溜,真係啖啖肉!

另一道主食都好吸引,大大塊烤安格斯牛柳配搭香脆炸薯條、菇同火箭菜,味道更富層次。牛柳脂肪含量同牛冧肉相若,肉質十分細嫩,脂肪部位更脆口多汁。

呢度就連生蠔都有得食,只要2位用餐就會奉送半打嚟自法國新鮮特級生蠔,入口即感受到濃濃鮮味,又帶有陣陣海水氣味,喺口中停留令人再三回味。另外餐廳細心到連擠檸檬用具都有提供,唔洗再擔心整到成手檸檬汁。

食buffet點可以唔食長腳蟹,小編見到大大隻蟹腳已經流曬口水,仲唔夾多幾隻慢慢品味?長腳蟹多肉又味道鮮甜,而且有齊鉸剪同餐具,食得好方便。

食滯咗都可以食返個沙律,多款配料選擇,有選擇困難症嘅小編,真係左諗右諗都唔知點揀。

就算食到幾飽,女人見到甜品都可以再食過。呢度甜品一定可以滿足到對甜品有追求嘅你,唔單止選擇多,而且件件都好精緻。覺得唔夠喉仲可以試下酒店推出嘅全新繽FUN週末下午茶自助餐,有7款彩色精緻甜點,以唔同顔色組合。

食自助餐大家最關心嘅梗係食物質素同優惠,由即日起至2017年5月31日食半自助晚餐或自助晚餐都有7折優惠嫁,除此之外仲有其他不同驚喜禮遇。

帝景酒店半自助晚餐或自助晚餐
由即日起至2017年6月4日,星期一至四半自助晚餐(18:00-21:30)\成人每位港幣288元起
星期五至日及公衆假期自助晚餐(18:00-21:30)\成人每位港幣488元,小童每位港幣338元

帝景酒店帝景軒
地址:荃灣汀九青山公路353號帝景 酒店二樓帝景軒
電話:3716 2898
營業時間:星期一至日: 07:00-23:00

You may also like...

Leave a Reply

Your email address will not be published. Required fields are marked *