【觀塘工廈咖啡專家 細味混合沖調咖啡】Kafeien Coffee & Kitchen

光顧小店有時就係為咗一份人情味同埋支持小店嘅理念。觀塘Kafeien Coffee & Kitchen一直堅持咖啡要有好品質,原來佢地由零售自家烘焙咖啡豆起家,一直堅持自家烘焙同炒豆,後來因為想將咖啡分享比更多人,同大家共享飲咖啡嘅寫意時光而開店。Kafeien呢個字係非洲文,意思解作咖啡因,唔知你飲過佢地嘅咖啡,會唔會都迷上佢地呢?


Kafeien室內裝潢以柔和米色同木傢俬為主調,牆上裝飾都同咖啡有關,空間夠晒大,坐低飲返杯咖啡食少少野夠晒舒服寫意。店主希望以咖啡會友,所以店內除咗有意式咖啡可以慢慢歎之外,仲有多達約10款已經烘焙好嘅精品咖啡豆供應,大家可以買返屋企自己沖或者叫咖啡師以手沖、虹吸或Aeropress沖俾你飲,可以慢慢品嚐!另外,佢哋仲有30幾40款咖啡豆可供預訂Roast to order,買夠一定數量仲會免運費寄埋比你添。

嚟到Cafe想享受一個輕食,不妨試試帕爾馬火腿沙律(HKD68),沙律菜嘅清爽加上帕爾馬火腿嘅鹹香,份量啱啱好,感覺輕盈。

如果嚟到想食返個晚餐亦有多款選擇,焗香草燒汁法國春雞(HKD168),先將雞炸完再烤焗,食落雞肉嫩滑,配埋廚師秘製燒汁好入味。開埋邊食起嚟好方便,青紅黃椒好爽脆,套餐仲包埋牛油菜沙律同餐飲添。

如果怕食好甜好甜嘅cake,呢個檸檬芝士餅(HKD38)就啱晒你啦,食落唔會好甜,低糖令大家可以食得更健康。
鮮奶咖啡(HKD 35/熱)揉合咗危地馬拉、巴西同巴拿馬咖啡豆,屬於中烘焙嘅咖啡豆。融合咗三種咖啡豆,令味道更多層次,飲落帶堅果香味,口腔留有少少回甘,鍾情咖啡嘅朋友不妨去到細味一番。

Kafeien Coffee & Kitchen
電話:6703 9599
地址:觀塘開源道60號駱駝漆大廈3座5樓S室
營業時間:星期一至六:09:00-22:00 星期日:11:00-22:00

You may also like...

Leave a Reply

Your email address will not be published. Required fields are marked *