【深燒好去處 雙重爆芝流心大啡菇】Lava Shao
嚟到太子酒吧街一帶，除咗飲酒仲想食少少嘢？呢間Lava Shao就啱晒你啦。佢地除咗係一間清吧之外，仲主打串燒，無論你係想食嘢定飲返杯一樣都啱你心意！而且價錢合理，飲完幾杯食返少少嘢就啱晒啦！
店內裝修較為典雅，以木為主，襯托串燒煙燻風味，配以皮製梳化椅，型格得嚟，坐得又舒服。
燒過嘅蝦爽口又彈牙，仲散發住燒烤獨有香味，去到串燒店好難抵擋呢份誘惑！蒜蓉燒黃金大虎蝦(HKD68/隻)就有齊晒呢啲燒蝦風味，仲要加埋蒜蓉仲同你開埋邊，蝦肉一夾一拉就成條拎晒出嚟食，夠晒方便又香濃滋味！
呢份鹽燒黃立䱽(HKD98/客)成條上都係98蚊一份，好抵呀！條魚燒完之後魚皮超級脆身但唔係有燶味，仲留有少少魚油，鹽燒風超香口！鍾意食魚嘅小編一人可以食晒成條！
芝士大啡菇(HKD15/件)店主話佢地試咗好多隻芝士，最終試過最好食係用2種芝士混合去整，包括深黃色嘅車打芝士同比較淡色嘅Mozzarella芝士。2種芝士混合，濃淡適中又可以輕易做到拉絲效果！一切開大啡菇，2種輕輕烤過嘅芝士就即刻流出嚟，加埋彈牙大啡菇真係好好味呀！
Lava Shao
電話：23622292
地址：太子西洋菜北街320號地舖
營業時間：星期一至日16:00-04:00
