【後現代摩登叢林 即試可愛幻彩熊仔餅特飲】Bold Italic

Bold意思係粗體,Italic就解斜體,當呢兩樣野結合,可能就好似觀塘駱駝漆大廈嘅Bold Italic咁,帶比你別具一格嘅創新感覺。有別於其他餐廳以統一風格視人,佢地以熱帶叢林配城市霓虹燈,舒適又帶點狂野嘅風格帶你出走庸庸碌碌、日日如是嘅平凡人世界,去一趟不可思議嘅奇幻旅程。


餐廳雖然位於工廈,但係裝修夠晒醒目。天花板除咗掛住植物,擺咗唔少紅鶴帶比你亞熱帶嘅感覺之外,天花板仲有城市感好強嘅霓虹燈,感覺神秘又迷幻。


呢度嘅套餐有餐湯、多士同飲品,主菜仲有好多選擇。其中仲有香煎南非鴕鳥肉(HKD138),鴕鳥肉相信都比較少見。其實鴕鳥肉好有營養㗎!佢除咗低脂肪、低熱量、低膽固醇之外,仲高蛋白、高鐵質、高鋅,號稱「最健康紅肉」。食落甘香瀰漫喺口腔,配上特製燒汁,帶少少孜然嘅味道,肉香更加濃郁!


另一個套餐主菜煎斯里蘭卡胡椒比目魚(HKD153)就啱晒鍾意食魚嘅朋友仔啦!比目魚肉實得嚟帶香濃鮮味同胡椒香氣,細意品嚐仲有少少甜味。加埋有煎過嘅意粉做底,夠晒特別,驚喜得嚟唔怕食唔飽啦。


大大舊棉花糖出動,就知道又係會令少女心爆發嘅甜品時間啦!棉花糖阿芙佳朶 (HKD38),將熱咖啡倒入棉花糖入面,即刻穿咗個大咕窿。小編鍾意整到佢融化之後撈埋棉花糖同雪糕一齊食,口感柔滑又夠甜絲絲。


無敵可愛嘅Bold Shake (HKD48),店主話佢仲有個名叫崖上的Blod Italic夠晒搞鬼!粉紅色加粉藍色夠晒夢幻,原來係士多啤梨味再加雲呢拿味嘅冰冰,飲落質感係smoothie!再加埋熊仔餅、彩色脆米、百力滋同雪糕仔,成班女仔即刻比佢迷住!

Bold Italic
電話:2850 7333
地址:觀塘開源道60號駱駝漆大廈3座3樓P室
營業時間:星期一至六:11:30-21:30 星期日:休息

You may also like...

Leave a Reply

Your email address will not be published. Required fields are marked *