【精品咖啡店開動!必試勁爆魷魚筒帆船】First Step Coffee

約朋友食飯Gathering最麻煩就係食完正餐想轉場食甜品又要等多次位,不過元朗嘅朋友有福啦!因為嚟到First Step Coffee唔止有特色正餐、精品咖啡,仲可以慢慢食埋甜品先走!雖然小店睇落係一間普通cafe,其實樣樣都落足心思去做㗎!店主仲係因為一次台灣之旅,發現咗自己對精品咖啡嘅熱愛,特登辭去高薪厚職都要學咖啡,開店同大家分享飲咖啡同品嚐美食嘅樂趣添。無論你鍾意咖啡定新奇食物,呢度舒舒服服嘅環境都會好啱你停低落嚟慢慢細意品嚐。

小店洋溢住文青氣息,磚牆配木製餐檯餐椅,再加上落地玻璃,隨隨便便影張相都令人感受到小清新嘅感覺。

鰻魚Bagel(HKD68)係呢度嘅招牌菜,小店開業以嚟就已經喺度啦。鰻魚係自家燒熟,成個Bagel有成半條鰻魚加滑蛋做餡,嫩滑又飽滿,加埋Bagel煙煙韌韌真係無得彈!佢地嘅薯條一樣都落足心機㗎,考慮到食客嘅健康,所以佢地嘅薯條都係非油炸㗎。


跟住落嚟就有賣相超級吸睛嘅FSC第一航(HKD128),魷魚筒上面插住塊鰻魚真係超似帆船航海緊呀!日式醬汁、木魚花、紫菜絲加魷魚筒,入面仲釀咗鰻魚飯,真係十級豐富。再伴埋店主自家醃製嘅韓國泡菜薯蓉墊底,真係夠晒獨特!喺第二度絕對搵唔到。


如果鍾意一餐有勁多嘢食,咁就一定要試特級全日早餐(HKD108)啦!佢最特別之處就係有個煙三文魚蟹肉藜麥卷,煙三文魚包住蟹肉同芒果,夠晒醒胃,啱晒夏天!個餐仲有埋芝士腸、蘑菇、滑蛋、車厘茄、自製薯蓉、鮮果沙律、蒜蓉包,仲連埋一杯咖啡添。


嚟到Cafe梗係要食埋人氣紫薯啦!呢個紫薯三重奏(HKD128)有齊爆勁爆流餡,用新鮮紫薯打成嘅心太軟、軟綿綿窩夫加雪米糍,仲有超足料紫薯crumble!窩夫蛋漿混和咗新鮮紫薯蓉,香脆外層仲散發濃香紫薯味。再配埋紫薯糯米糍,微微融化之後一啖放入口或者連香脆窩夫一齊都好好食!紫薯crumble先將新鮮紫薯焗腍,再淋上秘製紫薯忌廉同埋鋪上金寶粒烤焗。上面仲擺咗球豆腐雪糕,冷熱交融,味道有層次而好夾紫薯味!怕飲咖啡瞓唔著,仲可以試試紫薯Latte(HKD38/熱,HKD45/凍)味道微甜,但散發紫薯獨有香味,飲完個口仲留有紫薯嘅餘香添!不過要留意呢個每日用新鮮紫薯即製嘅紫薯三重奏,數量有限,售完即止㗎。

入到嚟當然想試試佢地嘅精品咖啡,全店都係用精品咖啡豆㗎,仲有提供埋手沖咖啡添。前面呢杯係Espresso(HKD20/single,HKD25/Double),小店提供好多種咖啡豆可供選擇,包羅晒果味香、酸度高、烘焙度高,或者比較甘香嘅都有,大家可以慢慢嚐試邊一種咖啡最啱你口味,尋找屬於自己嘅咖啡味道。而後面果杯Latte(HKD32)選用中度烘焙嘅巴西加哥倫比亞咖啡豆,味道比較果味馥香,果酸味道唔重,容易入口。小店定期會入唔同味道嘅咖啡豆,飲完覺得鍾意仲可以買返屋企自己沖添!

First Step Coffee
電話:9888 3608
地址:元朗鳳攸北街5號順豐大廈地下31號舖
營業時間:星期一至日12:00-00:00

You may also like...

Leave a Reply

Your email address will not be published. Required fields are marked *