【晶瑩剔透溫泉蛋 夾越式粉包滑不溜口】ZERO

”Start From Zero”係講緊由零開始俾你揀,難得一間旺角鬧市中嘅餐廳ZERO按你真正心意自由配搭Pizza,一切只係想客人同食物之間有更多火花,開創更多新口味。

餐廳部份座位仲可以一邊食,一邊睇廚師功架添。

平時等餐廳出新Pizza等到頸都長,一係就無驚喜,依家終於可以自己話事出主意啦!呢度主推嘅10.5″餅底(HKD98)已經包括1款醬汁、1款芝士同1款香料或香草。另外加錢仲有幾十款配料任你揀添,今次小編試咗喇沙醬、碎芝士、芫荽、蒜香魷魚、帶子同蝦嘅組合。一上枱已經聞到喇沙嘅香味,海鮮好似橡皮糖咁彈牙,勁新鮮!而最令人意外嘅係,放涼少少食喇沙味會更加突出。如果有選擇困難症,可以搵店員推介,或者揀餐廳配好嘅款式,下次問下香辣牛肩肉配咩醬好先。

餐廳連用咩器具盛載食品都好用心研究,平時見到石頭鍋都係熱嘅,佢地就行相反方向,雪凍佢變成保冷鍋,令沙律可以延長低溫狀態。酥炸銀魚沙律(HKD98)嘅秘製橘子油醋用迷你汽水樽裝起,令小編童心大發添,玩時玩,記得搖勻先好撬開個蓋呀。醬汁用5-6款醬料調製,酸酸甜甜好醒胃,配埋西洋菜、苦白菜同橙真係夾過打band。

蒸松露蝦蓉粉包(HKD148)因法式雲吞嘅概念而嚟,越式河粉皮包住蝦蓉,唔好以為真係變咗蓉呀,好多蝦肉,仲爽到好似喺口跳緊咁。如果你勁鍾意點汁就啱啦,依個松露汁點得多都仍然好清香,唔會搶咗蝦嘅鮮甜。溫泉蛋皮薄餡靚,點埋蛋漿真係滑不溜口。

另一特別推介就係巴馬火腿蜜瓜意大利飯(HKD148),平時蜜瓜同意大利飯未試過同場搭上巴馬火腿,但今次佢地真係打風都打唔甩,因為用埋蜜瓜汁燴飯,你以為好甜,夾返巴馬火腿一齊食又鹹鹹地。媽呀!兩種味都好清楚食到呀!

雜錦拼盤(HKD198)絕對係呃like神器,個摩天輪真係轉得㗎!小編勁愛墨西哥辣椒蜜餞雞翼,辣到滴汗之後會有少少甜味走返出嚟,建議等埋飲品先好食。照燒汁芝士肉丸串燒用豬、牛、雞三款肉打成,溝埋芝士好creamy。另外仲有烤土耳其麵包、伊比利亞火腿炸薯丸同炸秋葵魷魚都好好味。蜜糖黑松露醬、紅甜椒杏仁醬、香草醬、越式魚露4款醬汁更加帶俾你味蕾上嘅刺激新感受。

ZERO
電話:2918 1234
地址:旺角亞皆老街8號朗豪坊12樓05-09舖
營業時間:星期一至五:11:30-00:00;星期六、日及公眾假期:11:00-00:00

You may also like...

Leave a Reply

Your email address will not be published. Required fields are marked *