【返來吔飯喇!重回八零年代舊屋邨打邊爐】十下 SUPPA

「喂,好返嚟食飯喇!」相信好多喺屋邨長大嘅朋友仔一定覺得好熟悉,一眾媽咪擘大喉嚨大嗌嘅聲音同畫面。當年家家戶戶開晒鐵閘,鄰里守望相助,街坊喺長走廊開檯大戰四方城,細路仔周圍走嚟走去,有咩玩咩,聞到飯香就衝返屋企食飯,簡單開心就一日。但係隨住時日變遷,舊屋邨同當日情懷都慢慢消失,喺銅鑼灣嘅十下SUPPA,就以裝潢重現70、80年代舊屋邨風貌,令大家有機會再重溫昔日情。

入到嚟就好似穿越咗時光隧道,一下子就到咗80年代。紙皮地磚、圓木檯、懷舊碗碟、霓虹燈招牌,舊式雪櫃、熱水壼等等,每一個小細節同角落都充滿往昔情懷,甚有電影感。令人聯想起王家衛導演《花樣年華》唯美嘅畫面。


同電影唔同,成班朋友喺度坐低烚下烚下,就遠遠熱鬧得多。調味料有多種選擇,大家可以慢慢揀。

呢度有9種湯底可以選擇,小編揀咗龍蝦鮑魚海鮮鍋(HKD368)以蕃茄湯配大量海鮮,本地鮮帶子、象拔蚌、扇貝、鮑魚等一應俱全!回憶嘅味道擺滿一圍,左起順時鐘方向有懷舊果皮魚蛋(HKD36)果皮味道香濃,魚蛋爽口;豬腸粉(HKD30)用街邊小食打邊爐食,十分驚喜!將腸粉淥一淥,索晒湯汁,滑到”sir”住直落喉嚨呀!大刀手切本地牛肉(大)(HKD238)啖啖牛味香濃。黑松露帶子餃(HKD88/4隻)入面帶子好鮮甜,黑松露味道夠晒香濃。鹹蛋撈飯(HKD24)夠晒鹹香,粒粒米飯都充滿昔日情懷。安格斯牛肉(大)(HKD218)牛肉帶啲爽脆,食幾多都唔會覺得膩。最後要埋蔬菜拼盤(HKD62)就啱晒喇!

十下三寶滑(HKD128)有齊辣椒馬蹄牛筋滑,食落超香辣!仲有鮮打鹽蛋黃蝦滑,爽口又夠鹹香,仲有港式滋味臘腸鯪魚滑,媽咪Feel滿分!
大圍啤 TAI WAI BEER,啱晒夏天一大班人啤一啤瘋狂暢飲,分別有洋甘菊同佛手柑味,一齊嚟感受下本地用心製作!

十下 SUPPA
電話:3520 4111 / 5402 0239
地址:銅鑼灣銅鑼灣登龍街28號永光中心2樓
營業時間:星期一至日:12:00-01:00

You may also like...

Leave a Reply

Your email address will not be published. Required fields are marked *