【慢煮10吋爆長3A牛肋骨 8個鐘煉出所有精華】Hungry Pug

有寵物嘅朋友都會想日夜對住佢地,尖沙咀Hungry Pug嘅大廚兼老闆就用咗愛犬做餐廳招牌,上至logo,下至壁畫都佈滿愛犬嘅可愛樣子,令你無論影食物、影環境定係影人,都可以捕捉到佢。老闆喺加拿大學廚,所以餐廳都沿用好多當地食材去配唔同嘅口味。

餐廳地方寬敞,黑白色調增添返啲型格感覺,拉近可愛同時尚之間嘅距離。

前菜扒大蝦凱撒沙律(HKD128)選用比虎蝦甜嘅大頭蝦,炸過之後嘅香氣仲歷久不散添。澳洲空運嚟嘅BB Romaine肉地比平時食嘅沙律菜厚好多又鮮甜,夾埋加拿大煙肉一齊食完全唔會肥膩。

鎮店主菜低溫慢煮加拿大AAA牛肋骨配薯菜(HKD368)差不多10吋長,好似前臂咁大條,重量級到嚇死小編呀!牛肋骨嘅神奇之處係一條骨可以食到兩種質感,因為一邊接近脂肪層,口感似大舊牛腩肉;另一邊瘦啲就似西冷嘅質感。用秘製嘅燒汁慢煮一晚先出爐,連骨嘅精華都熬晒出嚟,肉已經好腍好入味,但都會配返燒汁俾你,淋喺肉或者薯菜都勁正。

想試加拿大特色甜品嘅朋友,一定要點呢個加拿大嘉年華會漏斗蛋糕配雪糕(HKD68),喺地球另一邊夏天先有得食,依家香港365日都食到喇!脆漿經過漏斗先炸出嚟,外形似大塊馬仔餅,但係內裡質感似煙韌嘅牛脷酥,配自家製嘅乾果,豆腐雪糕仲唔會好易溶,好味嘅程度達到一個人獨食絕對係應份!

北海道紅豆抹茶冰沙配紅豆腐雪糕(HKD48)非常濃味,因為冰沙就算溶咗都仲有充足到爆嘅抹茶味,北海道紅豆大大粒好好咬口,豆腐雪糕好清甜,好似真係食緊豆腐咁,直頭係鐵三角組合。

如果想包場開私人派對,老闆仲可以幫你設計餐單,令你嘅派對更加有特色添。

 

Hungry Pug
電話:2345 6856
地址:尖沙咀加連威老道29號信基商業中心2樓
營業時間:星期一至日:11:30-23:00

You may also like...

Leave a Reply

Your email address will not be published. Required fields are marked *