【為理想而戰 創意爆棚人氣食店】Aroma Dessert Cafe、秘、白宮 White House Cafe

喺香港講夢想,好多時都會被評為唔夠現實,甚至不設實際,但係勇敢追夢嘅故事永遠都好令人鼓舞同嚮往。喺呢個唔到執笠清貨都唔會有人醒起嘅年代,小編帶你走進荃灣街道,一齊睇下唔同餐廳老闆追夢嘅故事,感受每間店內食物所凝聚廚師嘅心思同信念。

位於荃灣鱟地坊Aroma Dessert Cafe主打梳乎厘班戟,店主Ryan由18歲開始學整餅,曾經去酒店學廚同擔任餅師。後來因為酒店發揮空間比較少,所以出嚟自立門戶,希望客人嚟到可以食到由佢用心打造,真正屬於自己認為「最好」嘅甜品。 繼抹茶之後新興嘅焙茶大行其道,如果你鍾意有茶嘅煎香味又唔鍾意苦澀,呢個焙茶心太軟(HKD60)就啱晒你!茶味香濃,配上多種生果同幼滑雪糕,雪糕仲有多種選擇,甜品即叫即製,所以都要需時10-15分鐘左右!

人氣呃like之選有山形縣白桃厚Pancake伴純乳酪(HKD65),厚厚嘅Pancake帶有濃厚日系feel,點影都咁靚!唯一唔同嘅係,佢比日系pancake嘅空氣感多咗份實在感,口感綿密,食完幸福感滿瀉。製作需時10-20分鐘。夏日炎炎,飲返杯冰凍特飲就最好!藍桔白桃冰露(HKD43),淺藍色加上白色雪糕,單睇外形已經夠晒清涼透心。味道有少少似波子汽水,連埋雪糕食凍冰冰好消暑!

Aroma Dessert Cafe
電話:6433 7787
地址:荃灣鱟地坊38-46號祐強樓地下42號舖
營業時間:星期一全日休息;星期二至日:15:00-18:30,19:30-23:00;公眾假期:15:00-18:30,19:30-23:00

第二站嚟到荃灣享成街日式餐廳,兩名店主都係廚師出身,有12年經驗,本來仲係同事添。個名神神秘秘咁係因為當時佢地返緊工成日偷偷地傾下未來開店大計,行動代號就係「秘密」,所以店名都改做「秘」!咁秘密其實理念都係想客人嚟到舒舒服服享用到佢地精緻嘅一餐,脫離之前工作嘅框框,隨時可以聽客人意見同改善。小店簡約而精緻,座位相對闊落,坐得都幾舒服㗎。

秘.樸葉味噌牛肉(HKD98)係白川鄉鄉村菜,燒時會有樸葉嘅香氣。牛肉下面係由5種味噌混合而嚟嘅味噌,仲混合咗洋蔥、蘑菇,因為店主想遷就港人口味,希望味噌味道濃郁而唔會過鹹。燒牛肉直至冒出白煙再將牛肉炒一炒,食落牛肉味道香濃又帶有獨特葉香。

秘.燒黑松露吉列牛(HKD148)食吉列牛一定要試試由店主獨創,以新鮮黑松露自打醬汁,牛肉配黑松露好夾,牛肉迷一定超鍾意!將牛肉輕煎,入口超香濃牛肉味!提提你,所有主食配珍珠飯加(HKD38)可以配定食,包埋秘之飯素、楓糖流心蛋同櫻花昆布湯。得意金魚其實係魚餃,今次小編試嘅係墨魚配櫻花鹽昆布湯,店主話佢地成日轉,次次嚟到味道都有驚喜。另外仲有碗飯素飯,有齊紫菜、芝麻、櫻花蝦,食落都幾香口。

鰻魚飯定價多數都偏貴,呢度蒲燒原條鰻魚飯素飯(HKD78)價錢非常大眾化,大大條鰻魚配上自調醬汁,食落香甜,好抵食!


電話:2350 9177
地址:荃灣享成街22號地舖
營業時間:星期一至日:12:00-14:30,18:00-21:30


追求夢想,除咗有實力都要有創意同拍檔。2個年輕人創業,論創意,荃灣享和街白宮,就一定滿足到你。2層樓高嘅cafe,2層都有唔同style。下層白色為主略帶懷舊感覺;上層擺放唔少汽球,感覺開心繽紛,客人嚟到可以自己揀坐樓上定樓下,希望無論係食物定係裝修都滿足到你。

海膽三文魚籽明太子意粉(HKD65)集齊三種海鮮於一身,新鮮海膽配上三文魚籽再混和明太子,意粉海鮮味濃,入口柔滑。

點解呢杯特飲叫阿凡達梳打(HKD48)?唔駛小編多講,一睇個顏色就知道!藍加綠變阿凡達,就係咁簡單,原來阿凡達酸酸甜甜咁,都幾消暑。

白宮 White House Cafe
電話:3956 5854 / 6158 5022 / 6204 5188
地址:荃灣享和街16號嘉華樓地下D舖
營業時間:星期一至日:12:00-22:00

You may also like...

Leave a Reply

Your email address will not be published. Required fields are marked *