【你準備好打卡未 3大搶眼又吸睛甜品餐廳】 ATUM Desserant、AMMO、DK Cuppa Tea

當相機食先已成爲一種普遍現象,食物已唔單止係局限於飽足,而係涉及所有感官嘅感受。餐廳為令顧客可以喺美食中感受到愉悅感,亦花盡不少心思。小編今次行盡港島,搜羅到三間富有特色甜品餐廳推薦俾大家,等你都可以影相打卡呃盡Like!

銅鑼灣視覺藝術享受甜品

甜品向來都係女仔摯愛,除咗其賣相夠精美吸引外,最緊要係可以影相呃Like。位於銅鑼灣L Square嘅ATUM Desserant,甜品花款多又夠創新,不時更有驚喜。以即興作畫去呈現甜品,滿足到客人胃口之餘,同時都帶俾客人視覺上嘅享受。就連女神周秀娜都前來朝聖,會橫掃社交網絡都唔係無道理喎。

餐廳鎮店之寳——IMPROVISATION(HKD348/二人用),可以話係黎呢度不容錯過嘅甜品。每檯客人由一個廚師負責作畫,廚師會觀察客人特徵後就畢加索上身,開始喺矽膠蓆上作畫。

以芒果醬同椰子醬畫出唔同線條,再放上色彩繽紛嘅甜品配料,有荔枝奶凍、香蕉果凍、綠茶糥米糍、朱古力脆脆、新鮮雜莓等。如果你有個別唔鍾意食嘅配料都可以提出,廚師會安排其他甜品代替。另外,廚師會邊做邊介紹每種配料味道,等你有時間可以不停相機食先。

驚喜在後頭,即製嘅液態氮雪葩,廚師一邊搞拌,煙霧一邊湧出,效果如仙氣飄飄,雪糕有兩種味道竹炭朱古力味同金手柑味,佛手柑雪糕味道微酸又獨特,配合竹炭朱古力雪葩,口感同味道都好夾。

ATUM Desserant
地址:銅鑼灣駱克道459-461號The L. Square 16樓
電話:2956 1411
營業時間:星期一至五 14:45-23:30;星期六至日 13:00-23:30

 

金鐘童趣幻想下午茶

另一個女神常出沒嘆下午茶熱點就係高級餐廳喇,位於亞洲協會香港中心嘅 AMMO,樓底足足有五米高喺香港甚為少見。簡約時尚嘅環境 由7 月 16 日起至 8 月 31 日將化身成荷蘭國寶級繪本人物- Miffy 朝聖地!事關餐廳邀得 Miffy 進駐,推出期間限定「AMMO x MIFFY 仲夏之旅」主題下午茶,帶大家走入童話故事。

一系列 Miffy 造型嘅美點,精緻又吸睛,點捨得去破壞佢。甜點有濃朱古力慕絲蛋糕、焦糖香蕉蛋糕、加上印有 Miffy 可愛樣嘅白朱古力草莓慕絲、馬卡龍及牛油曲奇等;配以 Miffy 杯同杯墊用餐,可愛度滿分。依家仲有得意限量版 Miffy 鎖匙扣贈品送添架。除咗品嚐美食之外,客人仲可於亞洲協會香港中心內同巨型 Miffy影相留念。Miffy 表面舖滿純金箔,約高 1.8 米。巨型 Miffy 裝置展覽期至 9 月 30 日。


不單止甜品仲有一啲咸點,一口芝士牛肉漢堡、甘荀仔伴鷹嘴豆茸、西班牙番茄凍湯,貼心照顧鍾意食咸點嘅朋友。提提想去試「AMMO x MIFFY 仲夏之旅」嘅朋友,二人用英式下午茶每客(HKD365),由 2017 年 7 月 16 日至 8 月 31 日,每日下午 3 時至 5 時供應。

AMMO
地址:金鐘正義道9號亞洲協會香港中心低層
電話:2537 9888
營業時間:星期一至四、日 12:00-23:00;星期五、六及公衆假期 12:00-00:00

 

上環悠閒同閨蜜嘆Tea

講起DK Cuppa Tea,最令人印象深刻嘅一定係每兩至三個月換一次嘅下午茶,每期主題都唔同,創意無限,眼見都會少女心爆燈。今次DK Cuppa Tea又出另一主題——優遊饗宴(HKD398/一人)。仲破天荒可以坐英倫號出海享用下午茶(HKD698/一人)(最少兩位起),讓你同閨蜜一齊倚著船桿隨著海風談天說地。

今個夏日有陽光與海灘,就差一隻可愛狗仔。DK Cuppa Tea經過細心擺盤,將今個夏天嚮往嘅情景代入呢一個下午茶,出海吹住海風食住甜品真係至高享受。甜品方面有來自法國嘅香芒芝士蛋糕、開心果朱古力蛋糕、蛋白糖餅同開心果馬卡隆,一人一個剛剛好。另外,經由急速乾燥技術保鮮嘅蔬菜脆片同有機烤粟米片配牛油果醬及乳酪醬更是女生摯愛。最吸引嘅狗仔造型白朱古力,雕製得相當精緻。

吃完甜品仲未完架,美國緬因州龍蝦等緊你。特別火炙過,龍蝦肉新鮮又爽口。仲有北海道珍寶帶子配薯餅,大大粒帶子炙燒後,外脆內軟。加熱嘅薯蓉滲出一股獨特甜味好惹味,配以珍寶青口同沙樂美腸,迎接著濃郁黑松露牛肝菌湯。好滿足呀!

DK Cuppa Tea
地址:上環新街市街19號地舖
電話:2386 3588
營業時間:星期一至日 12:00-20:00

 

 

You may also like...

Leave a Reply

Your email address will not be published. Required fields are marked *