【同閨密約會girls talk 歎盡尖沙咀4大下午茶】The Ritz-Carlton、Shangri-La Hotel、The Langham、Hotel Icon

日日30度高溫,咁熱天就算出街血拚掃貨都滿足唔到都市女性,食得舒適又可以影相呃Like先係真理。小編有推介!位於尖沙咀呢四間酒店新出嘅下午茶,每間都有特色主題,甜品造型各不同,更有小禮物帶走。酒店主題下午茶大多期間限定,趁熱抓緊夏日尾巴,快快約埋好朋友試試啦。

熱帶水果派對
High tea就要夠曬「High」,位於全香港最高建築嘅Café 103,絕對係High嘅代表,除咗品嚐精美甜點外,仲可以品賞維港兩岸景色,一舉兩得,俾盡Like!

曾於法國任職多年餅廚,同時包攬多個獎項嘅總廚Franck Michel今次為Café 103精心製作一系列以夏日水果為主題嘅甜點,為客人送上清新怡人嘅下午茶體驗。甜點有用多種水果製成糖漬水果蓉嘅熱情果泡芙、可口奶油酥餅底層嘅雜莓檸檬杏仁蛋白蛋糕、白朱古力脆漿包裹杏仁慕絲嘅杏仁黃梅朱古力球、甘香醉人嘅紅莓蜜瓜橙酒芭菲杯、外形可愛吸引嘅番石榴椰子芒果朱古力球。每樣甜點都好精緻,完全將整個仲夏滋味共冶一爐。

熱帶下午茶
供應日期: 直至8月31日
時間: 15:30-17:30
價格: 星期一至星期五 - 每位HKD382/兩位HKD622星期六、日及公衆假期 - 每位HKD402/兩位HKD642

Café 103
地址:尖沙咀柯士甸道西1號香港麗思卡爾頓酒店103樓
電話:2263 2270


細味鳥語花香

聽住現場演奏古典音樂,飽覽維多利亞海港景色盡在眼廉,細嚐鳥籠裝飾盛載美味下午茶,簡直係夏日一大享受。九龍香格里拉大酒店為大家呈獻全新「鳥·語」下午茶,精選美食包括米芝蓮二星評級香宮出品嘅上乘鹹點,以及一系列巧手精製清涼小吃及甜品。



由四層高鳥籠盛載懸垂掛於天花,相機即時要食先。今次仲有趣味十足嘅印有自己照片泡沫咖啡,同埋迷你鳥籠可以帶回家。咸點包括甜酒桔子鵝肝凍、脆皮乳豬多士及蘋果鳳梨酥;別類特色小吃更讓人鍾意,龍蝦卷伴日本柚子番紅花蛋黃醬、阿拉斯加蟹肉三文治及櫻花芝士餅等,食完一件接一件,完全停唔到口。

「鳥·語」下午茶
供應日期: 直至8月31日
時間: 14:00-17:00
價格: 星期一至星期五 - 兩位HKD488
下午茶套餐只接受網上訂座,每日限額30名

大堂酒廊
地址:尖沙咀麼地道64號九龍香格里拉大酒店大堂
電話:2733 8748

 

甜過蜜糖滋味
被評選為「香港十大最佳酒店」嘅朗廷酒店,大規模翻新後,驚喜一浪接一浪,今期同Guerlain法國嬌蘭皇牌護膚經典Abeille Royale 合作推出「殿級蜂皇精華蜜下午茶」,貪靚係女人天性,女人你心動未?一於約埋BFF去享受生活甜美滋味啦。

今次主題係蜂蜜,所以將所選用嘅蜂蜜注入下午茶各式美點內,並由酒店行政糕餅總廚Matthieu Godard操刀製作,款款美點外形別致。融入香港蜂蜜The Bee嘅金色馬卡龍,夾以黑朱古力同蜂蜜,入口甜絲絲。當然少不了朱古力主角,有薈萃鹽味焦糖、蜜糖朱古力同牛奶朱古力迷你饀餅。蜂蜜甜品點止呢啲,仲有幾款搶眼甜品,芒果蜂蜜慕絲,啖啖甘甜;法式千層酥,賣相吸引,令人一見傾心。

殿級蜂皇精華蜜下午茶
供應日期: 直至9月30日
時間: 星期一至星期五 15:00-17:30;星期六、日及公眾假期 14:15-16:15;16:30-18:30
價格: 星期一至星期五 - 每位HKD348/兩位HKD598

廷廊
地址:尖沙咀北京道8號香港朗廷酒店大堂
電話:2132 7898

 

夏日愜意午後
經常聽身邊女性朋友話去Hotel Icon食下午茶,一直有疑問究竟有咩咁吸引。今次有機會親自解答啦。GREEN環境舒適,落地玻璃令環境空間感更大,光線又充裕。原來呢度嘅裝修都大有來頭,全亞洲最大內垂直花園,好大片綠色植物花園牆壁,令人猶如置身芬芳花園中,再食住酒店全新推出「Zesty Delight」 下午茶,好夢幻。

「Zesty Delight」 下午茶係酒店同澳洲高端有機護膚品牌Appelles合作,由糕餅主廚何維城製作多款鹹甜茶點,包括迷迭香泡芙釀鵝肝醬、酥皮焗田螺、玉桂甜薯黑毛豬火腿沙律、玉桂金寶蘋果撻、柚子香橙芝士蛋糕等。相對地鹹點多啲,鐘意食鹹點嘅朋友可以試下呢個Tea Set啦!

「Zesty Delight」 下午茶
供應日期: 直至8月31日
時間: 15:00-17:30
價格: 星期一至星期四 - 每位HKD218/兩位HKD398
星期五至日及公眾假期 - 每位HKD238/兩位HKD458

Green
地址:香港九龍尖沙咀東部科學館道17號唯港薈
電話:3400 1300

You may also like...

Leave a Reply

Your email address will not be published. Required fields are marked *