【搶你海味 2017美食博覽盲搶地圖 】2017美食博覽

1蚊攻略路線圖嚟喇,聽日想執輸是不可能的!買飛位置有2個:碼頭接駁入會展舊翼天槁上的7-11便利店對出或Hall 1舊翼入口對出。有幾個攤位都係得首日有1蚊貨可以搶,大家要睇準邊樣做目標喇。我哋以最短路線會途經嘅1蚊貨及福袋位置俾大家參考吓:

注意:搶1蚊貨遊戲詳情請睇前文回顧:【唱定爆多1蚊 Mark實美食展激抵推介】2017美食博覽

1. 安記海味 / Hall 1對出排隊進場處 —— 佢哋只會喺第一日有得贏取鮑魚福袋,記得係喺場外排隊進場處派發福袋証核實參賽者資格,得頭10位可以參加,一進場就要去攤位:1C-B10玩,真係要早啲起身排隊呀。

2. 醉榴香 / 攤位:1D-C02 —— 同樣都係首日重頭戲之一,得頭3位朋友可以參與HKD1換一世免費食貓山皇榴槤冰皮月餅

* 奇華餅家 / 攤位:1D-D02就喺安記旁邊,想買熊貓福袋,奇華福袋就去埋啦。跟住去榮華途中會經過日清食品(香港)有限公司 / 攤位:1D-A02超力國際有限公司 / 攤位:1C-D02,鍾意食佢哋嘅麵可以買福袋,分別有埋特別版煮食鍋、保溫瓶同袋添。

3. 榮華香港 / 攤位:1C-B02 —— 首3日頭20位朋友可以參加「1蚊1手」迷你冰皮月餅任您拎走嘅遊戲,想知小編實測玩成點,請睇前文回顧,不過唔洗讚小編㗎。

4. 一斤果醋 / 攤位:1B-D12 —— 如果想1蚊換到旅行機會,首日嘅金輪大運轉擁抱健康贏巨獎一定要參加,10個名額(持票人仕)先到先得。

* Hello Kitty迷要注意:一斤果醋後面嘅味珍味(香港)有限公司 / 攤位:1B-D18有Hello Kitty福袋呀! 夠快的話,去搶燕窩之前掟個彎攞埋四海環球食品有限公司 / 攤位:1B-B27排檔Gift Set,每日10:30會免費派40份

5. 御燕軒 / 攤位:1A-E20 —— 每日首10位朋友(持票人仕)先到先得,可以換HKD1即燉純淨燕窩1片

6. 陳記點心 / 攤位:1A-C17 —— 出名嘅HKD1購買100粒魚蓉燒賣或22粒粉果,每日首10個名額可以搶購,詳情請睇前文回顧。

7. Q嘜 / 攤位:1A-B16 —— 要買Kinox建樂士不銹鋼平底鑊嘅朋友注意,因為名額得5個,換完即止,所以以呢個做目標嘅朋友就唔可以排到最尾先嚟呀。

除咗1蚊精選同福袋之外,仲有啲特選食品值得一試:

京士(香港)有限公司 / 攤位:1B-D32

今年美食博覽會率先發售全港首賣嘅Lotte士多啤梨乳酪多唧唧冰(HKD20/支),每啖都好似食冰凍士多啤梨一樣,超市同便利店都未有㗎。再加HKD10仲可以換埋原味乳酪多唧唧冰一支。另外,仲有雪糕俾你揀:

Lavelee魔鬼雪糕杯(HKD15/杯;HKD20/2杯)第一層係濃滑朱古力慕思;第二,三層分別係朱古力雪糕同薄荷雪糕,入面加咗刨冰脆粒,透心涼指數大大提高,口感仲幾豐富。

果臨門Frutodor / 攤位:1D-D32

擅長以天然駁枝方法研究不同口味嘅美國加州 Grapery果園,繼棉花糖、櫻桃味、玫瑰花香味等提子之後,今年特別為美食博覽準備咗五款新口味——純正Labrusca、濃郁嘅麝香×玫瑰花香味、濃郁嘅麝香×薄荷清新香味、濃郁嘅麝香×熱帶香味同典型葡萄酒香味。大家只要喺美食博覽買滿HKD300,就可以同一位朋友齊齊參與 Frutodor×Grapery千奇百趣提子試食會,每日五場,額滿即止。

 

前文回顧:【唱定爆多1蚊 Mark實美食展激抵推介】2017美食博覽

前文回顧:【2017美食博覽 狂掃超抵26折福袋】2017美食博覽

 

美食博覽2017
展覽日期:2017年8月17至21日(星期四至星期一)
展出地點:香港灣仔港灣道1號香港會議展覽中心
開放時間:8月17至20日 上午10:00至晚上10:00 ; 8月21日 上午10:00至下午6:00
票價:
「美食博覽公眾館」、「美食博覽尊貴美食區」、「家電‧家品‧博覽」及「美與健生活博覽」套票:40港元
「美食博覽公眾館」、「家電‧家品‧博覽」及「美與健生活博覽」:25港元
「美食博覽公眾館」、「家電‧家品‧博覽2015」及「美與健生活博覽」晚間進場票(8月17至20日18:00後進場):10港元,另可追加票價HKD15參觀即晚的「尊貴美食區」

You may also like...

Leave a Reply

Your email address will not be published. Required fields are marked *