【6款逆齡水果 拯救乾燥暗啞皮膚】懶健康貼士

依家成日流傳美魔女食嘢有幾健康,只要你明白食咩可以針對改善你想要嘅功效,做美魔女就指日可待喇!

想要逆齡或凍齡,一定要提高抗氧化能力,而花青素係一種天然抗氧化物質,可以喺顏色由紅至藍之間嘅蔬果揾到。花青素嘅抗氧化能力係維他命E嘅50倍,維他命C嘅20倍!認住下面呢6款水果,就話咁易幫你抗氧化對抗自由基。

藍莓——花青素含量最高嘅部位係紫色果皮,可以令細胞更有活力,改善循環系統,對消除眼部疲勞都好有益。藍莓糖分低,減肥都食得。

桑莓——除咗含有豐富嘅花青素之外,仲有豐富維他命同氨基酸。桑莓可以提高免疫力,改善皮膚嘅血液循環,明目烏髮,係女性非常好嘅美容食品。

紫葡萄——花青素含量僅次於藍莓,佢所含有嘅類黃酮都有強力抗氧化功效,係抗衰老絕佳食物。

紅心火龍果——經常食紅心火龍果嘅人,皮膚水潤度會比較高。佢仲有其他水果少有嘅植物性蛋白,幫助排出毒素。

車厘子——除咗有花青素,花色素同維他命E都同樣豐富,可以促進血液循環同提亮膚色。另外對排解尿酸,舒緩痛風都有幫助。

士多啤梨——本身含有豐富維他命C,配合埋花青素,可以保持皮膚彈性、淡化暗黃膚色。

You may also like...

Leave a Reply

Your email address will not be published. Required fields are marked *