【旅遊達人未出走先興奮 火車餐廳風景伴美食】CHOO CHOO

唔少朋友去旅行都鍾意坐火車睇風景,”CHOO CHOO"係舊式蒸汽火車嘅鳴笛聲,依家安坐長沙灣都可以感受到邊食嘢邊睇風景嘅旅行feel喇!CHOO CHOO將餐廳裝飾成火車車箱,仿真窗框仲會播放佢哋實地影嘅世界各地列車風景俾你睇。

老闆對食物質素好有堅持,由熬湯到上碟,甚至點樣保持食物水準,令食客有時間相機食先都細心考慮埋。

午餐先供應嘅日式咖喱蛋包飯配漢堡扒(HKD98) 將蛋皮扭到成朵花咁靚,再包住超勁厚漢堡扒,食落啖啖肉呀!本身珍珠米已經幾好咬口,佢哋仲加埋糙米,煙韌得嚟更加有營養。而且咖哩汁仲加咗蘋果汁同自家熬製嘅濃湯,微辣中帶點甜,女仔一定鍾意食。

帶子,虎蝦,魷魚筒,三文魚海鮮拼盤(HKD218)極度香口惹味,慢煮三文魚好嫩滑,其他海鮮都煎得好香口,當前菜食已經好開胃。

阿根廷紅蝦意大利麵配風乾蕃茄龍蝦醬.巴馬臣芝士(HKD178)麵嘅掛湯能力好高,刨咗少少芝士係面吊味,但唔會令到質地好杰。紅蝦大大隻,勁鮮味又爽口。湯底係自家熬嘅龍蝦湯,仲加咗椰菜花粒同風乾蕃茄,帶出少少蔬菜嘅甜味又增加口感。

飯後一定要食埋呢度嘅甜品L.J.K.(HKD108),雜莓做主味,酸酸甜甜最解滯。外殼用咗cream cheese、忌廉同牛奶製成,質地介乎雪糕同雪葩之間,都幾滑。下面嘅Mixed Berry Curd(凝乳)用Raspberry整,質地好似軟心啫喱,幾好咬口,不過呢層會溶㗎,所以影相要快手呀。仲有蜜糖脆脆,一次過食晒幾種口感添。

 

CHOO CHOO
地址:長沙灣順寧道364-368號昌暉大廈地下1號舖
電話:3707 1034
營業時間:星期一至日:12:00-15:00;18:00-22:00

You may also like...

Leave a Reply

Your email address will not be published. Required fields are marked *