【細路福音 三大親子餐廳冚家玩】Comic Park & Cafe、大樹先生的家、Fullhouse Kitchen

開咗學成個月,阿仔阿女習慣未先?仲想有長假放起碼要等聖誕,依家要唞吓氣就得返星期六、日囉!爸爸媽媽們就要趁周未前諗定有乜活動,weekend可以冚家出動喇!唔想戶外活動,最實際梗係舒舒服服坐喺室內,最好有得玩又有得食,一次過搞掂晒佢啦!今次介紹幾間親子餐廳,有動漫主題有台灣過江龍又有抵食親民,揀定邊間,呢個周未即刻出發啦。

開咗一年嘅Comic Park & Cafe,係香港第一間以動漫為主題嘅餐廳,喺MegaBox九樓成層都係兒童天地範圍之下,得佢一間食買玩齊晒,夠晒獨家。主題餐廳分三大區,有精品區、玩樂區同飲食區,精品區梗係有唔少動漫同卡通人物任你買,阿仔揀完、老竇可以買返個懷舊幪面超人figure添喎!

買完輪到玩,扭吓蛋掟吓波波呢啲兒童樂園必備項目啦!講到食物,餐廳每兩星期轉一次menu,香口脆炸嘢最啱細路仔口味,好似開心派對餐(HKD160)有炸雞翼、脆薯、炸手指魚柳同沙律就最大路兼搶手;食完鹹食甜,可以揀份鮮果超人pancake配朱古力雪糕(HKD52)

Comic Park & Cafe
地址:九龍灣宏照道38號MegaBox 9樓23號舖  
電話:2458 6032
營業時間 :星期一至五 11:00-21:00 星期六至日 11:00-21:30

 

 

試完動漫主題,不如又試吓台灣出品啦!「大樹先生的家」呢個名,喺家長界一定好熱門,有唔少港人都要去台灣總店朝聖,係親子餐廳嘅名牌。響咗朵,大樹先生的家揀咗嚟香港開第一間海外分店,選址喺荔枝角嘅D2 square,貪佢夠大有六千呎空間,貫徹台灣店特色,做到用餐同遊樂區都係1比1。

餐廳經理更由台灣過江坐鎮,講到餐廳特色,佢話最緊要保留初衷,「和我們台灣店的理念一樣希望保留初衷。我們想做到的是,這裡能讓孩子在一個最自然舒適的環境活動,安全和舒服,不需要太精緻,等同希望他們在純真的地方長大一樣!」最估佢唔到嘅係,香港店嘅員工,面試嗰陣,第一條被問嘅問題就係「你喜歡小孩嗎?」

空間感十足,食物亦唔馬虎。南瓜忌廉汁意大利粉配照燒雞扒(HKD188)係鎮店之選,選用日本南瓜,磨成蓉又香又甜,配埋忌廉汁好match;兒童餐便當(HKD118)有鰻魚飯糰配天婦羅炸蝦,好有日式feel,飯糰入面已加咗鰻魚,食得不知不覺又夠晒營養,啱晒怕食魚嘅細路。

大樹先生的家
地址:荔枝角長順街15號D2 Place二期1樓
電話:3184 0033
營業時間 :星期一 09:30-21:00 星期二 全日休息 星期三至日 09:30-21:00

 

 

玩完六千呎空間,最後一間就試吓俾小朋友食多國菜啦!喺愉景新城嘅Fullhouse Kitchen,主打馬來西亞多國菜,夠晒fushion味。兒童餐(HKD58)的的骰骰啱晒細路胃口,最特別係食完又有嘢俾小朋友玩,可以俾細路同家長們發揮畫畫天份,畫完仲可以即場打印出來做紀念,雖然靜態啲,不過就可以俾仔仔女女發揮吓創意囉!

Fullhouse Kitchen
地址:荃灣青山公路荃灣段398號愉景新城1樓1027號舖
電話:2337 0900
營業時間 :星期一至五 11:00-22:00 星期六至日 08:00-22:00 公眾假期 08:00-22:00

You may also like...

Leave a Reply

Your email address will not be published. Required fields are marked *