【爆紅熱食 日本膠瘋台灣搶奶潮】食焦

日本樂天網上圖片

講到呢期最hit嘅搶手貨,香港人梗係掛住去影灣仔個藍月亮,再去食海底撈啦!咁日本同台灣都有代表喎。日本樂天最近推出咗一款「記憶力香口膠」,聲稱食咗會增強記憶力,而目標觀眾係中老人,咁新奇嘅丁噹食物咁款喎!聽落新奇,但係實情只係香口膠入面有銀杏提取物,所以會有提升記憶力效果喎(即係阿媽鬧你冇記性,叫你食多啲白果咁解!)。

香口膠一出,即引來代購潮,而價錢仲好親民,分綠色12 粒裝同金色9 片裝兩種綠色包裝係粒狀金色包裝就係片狀不含稅價格賣140日元左右(約HKD9.6)

網上圖片

日本樂天網上圖片

有網民就即刻買嚟又食又玩,仲做埋測試啦梗係,綠色粒狀嘅呢,就真係有銀杏味道;而金色片狀就似足一般嘅薄荷味香口膠冇乜分別。食完係咪真係記憶力強咗,估到都知係-無!乜!分!別!唔好咁認真啦大家,搶先一步買嚟食咗都叫威啦,效果嘅嘢,其次啦!

 

香口膠有得搶,唔多唔少係因為夠gimmick啦,但最近台灣係連奶都可以瘋搶先神奇,簡直變成咗台灣最新嘅社會話題。乜奶咁巴閉?係義美品牌出品嘅「義美厚奶茶」,喺好多士COSTCO(美國大型超市喺台灣分店)獨家賣,一pack三盒只係賣135蚊台幣(約HKD34),又係夠晒抵啦!

網上圖片

fb圖片

呢個「厚奶茶」嘅賣點係標榜鮮奶含量有50%喎,加上得COSTCO獨家有得賣,所以個個仆到去搶,好快斷晒市,仲喺台灣校園出現代購同炒價情況,由台幣135炒到200,炒高咗65蚊(約HKD17),其實唔算炒囉,比起香港班演唱會黃牛,呢65蚊(約HKD17)係可以俾台灣班學生賺吓嘅!

fb圖片

fb圖片

斷晒貨搶唔到點算?義美上個星期五就拍心口保證,話會增加供應量,叫大家唔使咁心急去搶喎。留意返,依家係想搶都冇貨,同埋所謂增加供應量,係要等到12月先會!另外亦因為呢個厚奶茶效應,義美提早宣佈明年全體員工加薪6%以上,好happy啫!

有冇最近去台灣,有搶埋一份,試過呢個「厚奶茶」嘅港人可以講兩句呀?

You may also like...

Leave a Reply

Your email address will not be published. Required fields are marked *