【「菌」住你個胃 花花世界歎意大利菜】Diletto

意大利餐之所以浪漫係因為有情調,嚟到尖沙咀Diletto就好似入咗花花世界咁,連食物嘅擺設都靚到dum一聲。“Diletto”喺意大利文解「愛」,老闆想每位客人喺度都感受到愛,所以座位嘅空間好充足,俾大家舒適咁享受美物。想影多啲靚相可以坐窗邊位,有滿滿嘅花飾同樹枝形燈飾做襯托。

大廚話意大利菜好多時用上菇菌類食材,我哋就同大家介紹幾款心機菜式啦:

Baked Portobello(HKD148)嘅燒烤大菇慢煮2個鐘再煎,保持到juicy嘅質感又香香地,然後加埋巴馬火腿同意大利芝士一齊焗。最後配上慢煮嘅水嫩溫泉蛋同火箭菜,係好清新嘅前菜。

Seared Hokkaido Scallop, Porcini and Truffle Risotto(HKD268)除咗用牛肝菌之外,仲用埋浸菇嘅水煮意大利飯,完全將菇嘅精華滲透喺呢個菜式。配埋意大利芝士同輕輕煎過嘅帶子剌身,外脆內嫩又清清地,食落一啲都唔滯。

呢度嘅餐包同Pizza餅底都係自家製。薄皮嘅Black Truffle and Duck Fole Gras Pizza(HKD268)用茄汁同意大利芝士做底,聞落好清香,因為焗好餅底之後淋咗黑松露芝士醬、黑松露油同黑松露片。最後加埋煎到金黃色嘅鵝肝,夾住火箭菜一齊食可以減輕油膩感。

好食嘅甜品都係用心製作,Mango Mousse with Coconut Marshmallow(HKD88)嘅椰絲棉花糖都係自家出品,mousse切開係流心芒果餡,一次可以食齊兩款甜品仲唔大滿足?

呢度嘅Special Menu喺晚餐時段先有,隔幾日就轉款,大廚會按食材同季節調配菜式,俾大家多啲新鮮感。

 

Diletto
地址:尖沙咀漆咸道南11-15號余仁生中心1樓
電話:2117 1411
營業時間:星期一至日: 11:30-23:00

You may also like...

Leave a Reply

Your email address will not be published. Required fields are marked *