【激讚海底撈蕃茄湯底 網紅趕食早場唔使排隊】食焦

海底撈攻港試業咗一個星期,唔少人都即刻搶先去食趕住comment,有網紅YouTuber更加拍埋片直擊,好似arhoTV嘅Sunny,試業第二日就去咗捧場,條片仲引嚟過16萬view添。

arhoTV YouTube截圖

Sunny同女友Creamy(都係網紅YouTuber)朝早十點三就去咗海底撈,成功唔使排隊就有得食(晚市每晚限派五十張籌,好快輪完,有籌喺手都仲要排)。不過一大朝早要隊餐咁heavy嘅邊爐,都算係挑戰喎!小編搵咗Sunny講多兩句,原來佢食上癮,短短三日就食足兩鑊海底撈,而且為咗唔使同人迫爆場,佢兩次都係食早場。

arhoTV YouTube截圖

arhoTV YouTube截圖

Sunny話:「我去第一朝好早,十點幾到咗,反而係佢哋(海底撈)啱啱開舖未準備好叫我等陣,跟住好快入到去,我哋算係第一枱客,之後先有啲大陸團陸續入嚟;第二次我哋就晏咗少少,十一點九先去到,不過都係等咗十五分鐘就有位。」

arhoTV YouTube截圖

arhoTV YouTube截圖

本身未食過海底撈嘅佢,係女友Creamy喺深圳食過想再食,Sunny陪食結果就食上癮。「點解連食兩朝?係真係因為個蕃茄湯底,我堅掛住個湯底,佢哋個蕃茄湯底好入味,」除咗個湯底,Sunny另一最愛就係個豬腦,因為佢唔食牛,所以佢話豬嘅選擇可以再多啲就好喇!「仲有個拉麵都係堅好食!」睇埋師傅即場表現,再加分添啦!

arhoTV YouTube截圖

講到服務同環境,Sunny都一樣俾like,「新開好乾淨啦,啲員工又好有禮貌,睇得出佢哋係受過專業訓練咁,服務周到!」有乜唔好?咁梗係價錢可以再親民啲就good啦,「價錢平啲就最好啦,比起其他打邊爐都真係貴咗啲囉,我哋兩個人去食都要差唔多七百幾八百蚊,不過如果計埋個service係值嘅,同埋女仔又可以gel埋甲又抵返!」會唔會呢幾日再食?Sunny話要唞陣喇,可能下次試吓食夜晚又睇吓乜feel!

arhoTV YouTube截圖

所以話,如果唔想同人迫,又食得落咁豐富嘅「早餐」,小編提議你朝早去食海底撈啦(不過首先你要閒日放到假囉)!

arhoTV YouTube截圖

You may also like...

Leave a Reply

Your email address will not be published. Required fields are marked *