【冷壓果汁霉素超標要下架 營養師教你分真假排毒】懶健康貼士

呢個星期消委會公佈咗測試40款冷藏果汁樣本嘅結果,其中2款澳洲牌子嘅冷壓果汁驗出霉素超標要即時下架!其實近年冷壓果汁大熱,仲講到話有排毒功能,甚至有千幾蚊嘅排毒減肥套餐出現。究竟點樣嘅果汁先夠好,定係食原隻水果最健康?小編搵咗註冊營養師謝詠瑩 等佢講吓有乜好建議:

冷壓果汁有咩好處同壞處?

冷壓果汁嘅技術的確有助保留某啲營養素,尤其係水溶性維他命,例如維他命B、C、葉酸等較易受熱力破壞嘅營養素,但維他命C需要加熱到大約70°C先會明顯流失。雖說傳統嘅榨汁機或攪拌機喺快速轉動時會產生熱力,但會唔會加熱到一個高溫點會破壞營養素呢?呢方面需要更多數據支持。而且好多營養素都比較耐熱,例如纖維、鐵、鈣等等。

 

冷壓果汁有冇排毒功能呢?

好多時冷壓果汁果糖太高,部份人會腸胃唔舒服而引致肚瀉,誤以為有排毒效果。但排毒係指排走便便,或經過排汗將身體內唔需要嘅代謝物排走,同埋肝臟會幫助分解有毒物質,再經腎臟排出身體。而原個水果食先會食埋纖維,促進腸道蠕動排走便便就係真正排毒。

冷壓果汁真係比鮮榨果汁健康嗎?

以今次消委會報告嘅橙汁樣本為例,鮮榨橙汁每100毫升平均約有35毫克維他命C;而經過巴斯特消毒法或冷壓嘅果汁樣本,每100毫升平均約有33毫克維他命C,其實唔係相差得好遠。但係邊款果汁都好,如果隔晒渣,纖維會比食原個蔬果低,而抗養化營養素都會伴隨纖維被抽走。

 

點樣分真假冷壓果汁?

要睇營養表係咪100%純鮮果,正常唔會寫水或濃縮果汁嘅字眼。

 

原個生果 vs 冷壓果汁 vs 濃縮果汁 vs 天然果汁排次序,最好到最差係咩呢?

1. 原個生果:纖維最豐富又食埋落肚,會增加飽肚感;而可以減慢吸收糖分嘅速度,血糖會比較平穩。

2. 冷壓果汁:無加熱咁多,keep到多少少維他命C。

3. 天然果汁(盒裝或包裝好嘅100%果汁):通常經過巴斯特消毒法,以比較高溫少少處理過,容易啲流失維他命C。不過有啲會再添加返維他命,最後都要睇營養標籤做比較,未必差過冷壓果汁。

4. 濃縮果汁:通常經過好高溫加熱,然後再加水份,會流失更加多營養素,例如葉酸、維他命B雜等等,仲有好多其他添加劑。

1日可以飲幾多果汁呢?

香港衛生署建議每日應該食2份水果,1份水果大約等於180毫克果汁,但唔建議一次過飲360毫克當食咗2份。建議每日最多飲180毫克嘅鮮榨果汁,因為食用新鮮水果嘅纖維同水溶性維生素比較高。

 

想排毒食咩水果最好呢?

木瓜、熱情果、火龍果同纖維素效高;西梅有天然瀉藥成分。下面嘅數據俾大家參考唔同水果嘅纖維量:

保存水果小貼士:可以加少少檸檬汁,當中嘅維他命C可以令水果無咁易氧化。

消費者委員會網上圖片。

消委會公佈40款市面常見嘅冷藏果汁測試結果,好多都誇大營養成分,其中有2款冷壓果汁驗出棒曲霉素超標要下架!
(棒曲霉素常見於發霉嘅蔬果同穀物,嚴重會引致腸胃充血、抑制免疫反應、損害神經、影響胎兒發育)
  • 二款果汁有棒曲霉素超標須下架:
  1. 「Presha  Fruit」Pressed Pink Lady Apple
  2. 「Presha  Fruit」Cold Pressed Apple & Strawberry

「Presha  Fruit」二款果汁有棒曲霉素超標須下架。

測試又發現,4款未有標示含防腐劑嘅果汁,分別驗出不同嘅防腐成分:

  1. 「PRET」Super Natural Juice – Apple, Guava & Cranberry驗出18ppm嘅苯甲酸,不過因配料標示含紅莓(cranberry),本身天然含苯甲酸,消委會指驗出嘅苯甲酸應屬配料本身
  2. 「City’super」青蘋果菠蘿番石榴汁驗出14ppm嘅山梨酸
  3. 「Tesco」100% Pressed Forest Fruits Juice驗出9ppm嘅二氧化硫
  4. 「HYAKU」100% Cold Pressed – Orange,Pineapple,Grapefruit,Lime驗出23ppm嘅苯甲酸同171ppm嘅山梨酸

小編到時代廣場City’super,發現青蘋果菠蘿番石榴汁嘅價錢牌仲喺度,不過就唔見有貨,店員話只係賣晒,要第二日先有得買。買2支仲有特價,HKD42搞掂!

而仲賣緊嘅其他口味果汁,其標籤依然係寫住「不加防腐劑」囉!

至於銅鑼灣嘅PRET,就已經見唔到Super Natural Juice – Apple, Guava & Cranberry有得賣喇!

HYAKU代理商稱向製造商瞭解後,原來對方喺冇通知嘅情況下,喺該批次飲品擅自加入含有山梨酸嘅蘋果醬,代理商未來將加強檢查。受影響嘅市民可憑單退貨。

 

You may also like...

Leave a Reply

Your email address will not be published. Required fields are marked *