【Wine & Dine埋單計數 龍蝦包賣斷 酒檔宣傳勁】食焦

今年嘅「美酒佳餚巡禮」(Wine & Dine Festival)尋晚收檔,連續四晚吸引咗唔少人去狂飲狂食,現場各攤位梗係要出招吸客,希望呢四晚有好成績啦!小編搵咗兩個攤位檔主,一檔飲、一檔食,佢哋為咗呢次美食節攤位究竟使咗幾多錢,成績又滿唔滿意先?

現場所見,龍蝦包真係好受歡迎喎!

本身做開食品批發、主攻黑松露嘅「Fresco dal Mercato」,今次專登為美食節整咗個獨家龍蝦包,秘製醬料配龍蝦肉,估唔到反應咁好,上星期四第一晚已即刻賣晒!檔主Kathy話:「一晚賣咗三百幾個龍蝦包,斷晒貨!我哋公司本身係賣開黑松露醬,為咗呢次美酒節特別整咗呢款龍蝦包,用我哋自己秘方將黑松露醬撈落沙律醬度,再加埋龍蝦,個味好香好夾。」

Kathy話海鮮同黑松露醬好match,先諗到呢味霸氣龍蝦包出嚟!

Kathy話佢哋八月開始入紙申請,好快已經批咗,跟住即刻揀檔位籌備。問佢用咗幾多錢搞檔,佢就話唔方便透露喇,咁今次埋單計數賺定蝕?佢話:「其實冇話諗住會賺好多㗎!可能『打個和』囉!無所謂,最緊要反應好就得。」以往一直有做開市集擺檔,但係大型美食節就係頭炮,難得呢幾晚反應咁好,Kathy原來已經準備好下次喇,兩個月後會到糖廠街市集出擊,到時又有新諗頭啦!

有包食有酒飲,正!

同樣都係第一年參加美食節嘅Ming,身為「Y Cocktail & Mocktail」酒吧老闆嘅佢,知道今年大會新增咗「氣泡盛薈」賣氣泡酒嘅專區,Ming喺三個月前就已經入紙申請,佢話旅發局好快批咗,跟住佢就立即入新酒。「計埋租場同入貨,萬幾蚊一晚租,我又特別入咗啲德國提子酒,加埋入貨錢,成檔嘢使咗十零萬啦!」

Ming現場調酒,對手未停過。

現場有唔少人都等Ming親自調返杯特製氣泡酒,呢幾晚佢就每晚調足至少二百杯酒,咪話唔厲害!不過佢竟然話:「未係最勁喇,我試過喺酒吧一晚最高紀錄係三、四百杯!」調酒之王Ming話今次擺檔有得賺當然好,但佢估計可能埋單都係「打個和」!「其實擺檔最大目的都係想幫酒吧宣傳,想多啲曝光,咁今次我覺得係做到嘅!」下年會唔會encore?Ming就話未決定,但佢最想搞個沙灘音樂節,可以一邊聽歌一邊賣酒!

為咗切合大會新嘅氣泡酒區,Ming特別調製咗兩款雞尾酒。

四晚「美酒佳餚巡禮」落幕,下年再嚟過啦!

You may also like...

Leave a Reply

Your email address will not be published. Required fields are marked *