【甜品新變法 水果加中式茶絕配潮食】2DP

甜品店2DP係厚福街嘅新力軍,個名好特別?其實係2 Decimal Places嘅縮寫,意思係講求精準,就好似店內每一味食物嘅煮法都好精準囉!雖然話係食甜品,但原来到有新玩法,就係以調酒嘅概念,將水果加入中式茶嘅配搭,而2DP對茶底嘅要求仲非常高,全部茶底都由三百年歷史古樹嘅採摘。難怪連上屆港姐冠軍馮盈盈同美容瑜珈達人倪晨曦都係2DP嘅常客啦!

以開放式廚房嘅設計,俾客人可以睇到員工做茶嘅每一個步驟,唔係用茶粉去沖沏,而係用真正茶葉沖沏。簡潔嘅配色,更加睇得出佢哋認真嘅態度。

連貼地港姐馮盈盈都係座上客,仲唔快啲嚟,隨時俾你巧遇到!

睇落似士多啤梨,原來係火龍果乳酪冰 (HKD46),用咗紅茶做配搭,火龍果味好清新,完全冇諗過原來紅茶都可以咁樣配囉,啱晒女仔一邊打卡一邊歎茶。外賣仲會平啲添呀,行完街快啲去飲返杯繼續作戰。

香滑嘅焦糖燉蛋伴意式鐵觀音(HKD63),焦糖燉蛋可能冇乜新意,但Gelato鐵觀音你又試過未?只有香濃嘅茶香,仲幫中國茶飛甩老套,變成一味咁潮嘅甜品。

為咗推廣健康嘅素食生活,2DP自家製素漢堡配蕃薯(HKD88),炸蕃薯條食落唔油膩之餘,素漢堡係用咗藜麥、紅菜頭、蓮藕幾種唔同嘅材料造成,連包都係自家製造。除咗顏色,連口感都非常相似,應該連食肉獸食咗都唔知係素食。

仲有新推出嘅觀音冰(HKD82),鐵觀音Gelato配上綿綿冰沙,仲用埋充滿香港特色嘅公雞碗,夠晒新意!

2DP – 2DecimalPlaces
地址: 尖沙咀厚福街12-12A藍馬商業大廈地下
電話: 3705 9590
營業時間:星期日至四12:00-00:00 : 星期五至六12:00-01:00

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *