【被屈賣狗肉 壓力大暴瘦 羊腩煲店主:真相大白】食焦

早前網上嘅「動物生命糾察隊」群組,出po話元朗一間羊腩煲店「掛羊頭賣狗肉」,仲話有街坊日日聽到有狗慘叫聲添!即使店主出嚟澄清,一樣俾網友追擊。直到食環喺11月3日出咗化驗報告,證實店內樣本為羊肉,店主幹哥上星期三再接受《東張西望》訪問,期間聲淚俱下話終於還一個公道!

幹哥上星期接受《東張西望》訪問,喊晒口話好辛苦!(無綫電視截圖)

幹哥上星期喺自己小店嘅專頁po咗食環化驗報告,還自己清白!(文樂美食小炒王fb專頁圖片)

連日嚟幹哥都要接受唔同媒體訪問,又要為舖頭預備,日日踩足十幾粒鐘,佢女兒陳小姐就話總算鬆一口氣,佢同小編講:「依家真相大白!一開始好唔開心,點解會有人亂咁作嘢都得!」佢話爸爸為咗呢件事瘦咗十幾磅,「因為好大壓力,有人經過舖頭都指住佢鬧佢,網上有人仲話要揾人嚟打佢,搞到佢好大壓力,佢好困擾瘦咗十幾磅!」除咗面對網絡欺凌,仲有生意壓力,幹哥女兒話發生「掛羊頭賣狗肉」風波後,生意跌咗七成有多。

依家幹哥每日都日踩十幾粒鐘。(無綫電視截圖)

依家真相大白,小店生意先有返生機,幹哥女兒話呢個星期,爸爸日日踩足十幾粒鐘。「有時做到天光先收工!依家每日都要兩隻全羊嚟做羊腩煲,又要應付預訂啲客,所以好忙!希望慢慢生意好返!唔好再有人亂講!」

羊?狗?仲要問?(無綫電視截圖)

俾人老屈「賣狗肉」風波,幹哥暴瘦咗十幾磅!陰功!(無綫電視截圖)

其實未有食環報告前,幹哥喺舖頭已貼咗大字報聲明!(無綫電視截圖)

食環化驗報告出咗,還幹哥一個清白,撐幹哥嘅網友仲搵埋「原兇」,就係本土行動成員何來,網友群起要佢道歉!幹哥女兒話依家都氣難平,「我唔識佢(何來),同佢完全冇過節,最嬲係佢哋無中生有,亂咁作故仔,唔知點解佢哋要咁做!」
幹哥女兒仲話,雖然依家真相大白,但係老屈佢哋賣狗肉嘅,一樣死撐,一句道歉都冇!「佢哋依家仲死撐,話係一個局,話平時食環做嘢點會咁快!其實係佢哋每日都打去食環度投訴,食環先咁快有行動即刻化驗咋嘛!」報告出埋,冇得再老屈,希望幹哥快啲收拾心情、快啲回返磅肥返,繼續整多幾煲好味羊腩煲啦!

立法會議員鄺俊宇亦俾唔少網民鬧佢抽水,話佢發生「賣狗肉」風波時,即刻話會跟進(下圖),事後仲刪po添!(鄺俊宇fb專頁圖片)

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *