【韓鍋夾本地水耕菜 即炒芝士鍋清新味】韓讚

銅鑼灣有唔少樓上餐廳,喺渣甸街嘅新商廈Aura on Pennington就有間以清新為主嘅韓國餐廳韓讚,除咗有好多蔬菜元素之外,亦保留傳統風味嘅菜式。

呢度設計充滿色彩,感覺好時尚年輕,啱晒後生仔女嚟。

韓潮春川芝士雞鍋(HKD278)同價可以揀黑豚肉,加HKD20可以轉牛仔肉。服務員會先幫你炒熟蔬菜、年糕同肉類先,淨係起鍋時嘅蒜香味小編已大叫肚餓喇!想要幾辣就炒嘅時候講,因為邊炒邊調味,今次落咗一半醬,辣度適中,始終韓國辣醬帶甜,唔會覺得噴火要飲水。炒到咁上下熟先落芝士就溶得啱啱好,包埋雞肉一齊食口感嫩滑又滿足。

大家有無發覺韓潮春川芝士鍋雜錦海鮮鍋(HKD398)都好多蔬菜,仲好新鮮呢?餐廳選用本地水耕菜,所以絕對清甜新鮮。呢個大堆頭海鮮鍋,有新鮮大蝦、原隻韓國魷魚、韓國八爪魚、青口同蜆,材料非常豐富。微辣嘅韓式湯底滲透海鮮同蔬菜嘅甜味,亦令食材更加滋味。相比之下,海鮮鍋比芝士鍋無咁辣,味道鮮啲。

睇劇集成日見韓星食牛骨大蔥湯(HKD148),小編都唔執輸試一試。經過長時間熬製到奶白色嘅牛骨湯入口清甜,又有濃郁嘅牛味,真係可以當湯飲!牛肉煲到好腍但依然有咬口,仲有滑溜溜嘅韓國粉絲,完全食到正宗韓味呀!

韓國養生粥品之一嘅人參崧子雞粥(HKD88)一定俾到驚喜你,新鮮人參同紅棗令粥底可以用fresh嚟形容,綿滑香甜,好啱秋冬食。加上崧子同脆米增加雞粥口感層次。

 

韓讚
地址:銅鑼灣渣甸街66號Aura on Pennington 2樓
電話:2152 2883
營業時間:星期一至日:11:30-23:00

You may also like...

Leave a Reply

Your email address will not be published. Required fields are marked *