【即試三間蒸糯米雞 個汁濕到似食糊仔】伏務台

相傳糯米雞係夜市小食,後來為咗方便小販拎去賣,先用塊荷業包住佢,又有人話糯米雞係用啲酒樓餸頭餸尾做餡再拎塊葉包起㗎!無論點都好,糯米雞無論早餐定午餐都可以見到佢嘅影子,今日豬太郎又買咗三間舖頭嘅糯米雞,一齊蒸晒佢哋,試吓邊間食得過先!

包點達人

外賣點心店包點達人,一件糯米雞 (HKD23),買嘅時候店員仲提小編要蒸30分鐘,喺外賣店度買,無包裝,分量最大件。

打開荷葉,香味十足,飯就一定夠分量啦,不過汁就少咗啲,食到尾得返啲飯就有啲乾身,中間啲料都幾足喎,有雞有豬各一件,仲有鹹蛋黃,唔錯。

價錢︰●●○○○

分量︰●●●●●

醬汁︰●●●○○

總分︰10 (15分滿分)

 

龍鳳茶樓

梗有一間喺左近嘅7-eleven都買到嘅龍鳳茶樓糯米雞(HKD17.9),便利店最方便就係可以即刻喺舖入面叮(約5分鐘),不過小編都係買咗返去一齊蒸,唔好話小編大細超啦。

龍鳳茶樓嘅糯米雞,飯同汁比例幾平均,不過醬汁方面就鹹咗啲,但有同事就好鍾意佢啲汁,話食落先夠味喎!不過佢啲肉就細嚿咗少少囉!

價錢︰●●●●○

分量︰●●●○○

醬汁︰●●●●●

總分︰12 (15分滿分)

 

淘大

行到去百佳買嘅呢款淘大極品糯米雞 (HKD14.9),外形細細一樣可以揀叮5分鐘或者拎去蒸30分鐘,包裝講到有秘製汁料,睇嚟都有啲料到,好!蒸完再睇吓入面龍定鳳。

可能秘製汁料真係多咗啲,表面睇好似無咩事,食落啲糯米雞濕到好似糊仔咁,料就肉眼睇到三片臘腸,肉方面可能太細,食唔出味,啲飯仲好重酒味添!

價錢︰●●●●○

分量︰●●○○○

醬汁︰●●○○○

總分︰8 (15分滿分)

 

豬太郎點指兵兵

本來對龍鳳茶樓最無信心,諗住7-11都係買嚟醫肚為主,無期望之下發現佢味道都OK喎;包點達人就表現平平,食落係唔差嘅,啲料都叫有件雞食吓;輪到淘大,作為香港廠自家製,本應都對佢信心十足,但食落個汁真係太濕,搞到我好似食緊糊仔咁,佢有臘腸呢樣係威嘅,但小編除咗可以講有臘腸食之外都唔知有咩幫到佢。

 

中伏by #豬太郎

美術by #Mui Mui

攝影by #大肚Dum

《伏務台》星期一伏務大眾,歡迎各界報料。

You may also like...

Leave a Reply

Your email address will not be published. Required fields are marked *