【網友狂插食店爆粗告示 腦細認玩嘢:好過冇人知】食焦

上星期二晚有網友喺fb群組po咗張食店告示,內容是咁的:「致各星級食客,咪X咁肉酸,最低消費三條野(嘢)」、「伙記仲惡X過腦細」,又話「收費已經咁X平,你當自己係食神呀?!」爆晒粗好大怨氣喎!網友反應梗係大,有人話一定唔會幫襯為乜要受氣、又有人話呢位腦細講中晒飲食業心聲!

上星期「爆粗告示」喺網上洗版。(巴打絲打Facebook club群組圖片)

有鬧有撐,通常都係。(網上圖片)

不過更多人反應係,究竟係邊間食店貼張咁嘅告示喺餐牌。結果神通廣大網友們好快已搜尋成功,開估咗原來係荃灣嘅「老巷麻辣燙」呢間小店(不過小編發現咗有唔少po係腦細自己開估㗎喎!)

真·腦細親自開估兼回應話會好好招呼大家!老闆Arnold原来仲選過港男!(網上圖片)

老巷麻辣燙,巨聲幫劉威煌都幫襯過,仲同腦細Don(右)合照。(網上圖片)

點都好啦,起碼呢幾日嚟呃咗唔少嬲豬同like,小編都搵咗食店經理Katrina解話,佢話腦細(Don同Arnold)見到網友反應咁熱烈係開心嘅!「冇所謂啦,好過冇人知!依家正負兩邊反應都大,都係帶出咗宣傳效果嘅!」佢話腦細本身係做設計,好多時都會諗啲得意嘢出嚟玩吓,「之前我哋喺舊舖嗰陣已經係咁,餐牌就出『老味日報』、牆身又貼滿好多玩嘢街招咁!」

腦細設計嘅奶滋Lin惡搞米芝蓮。(老巷麻辣燙fb專頁圖片)

問佢覺唔覺得今次玩大咗?Katrina話:「又唔會嘅,不過就真係冇諗過會有咁大迴響。」不過佢就話告示入面講嘅「伙記惡過老細」確係真嘅,「開舖早期的確係有客人投訴過,話我哋啲伙記講嘢大聲嘅,不過依家已經冇呢啲情況喇!」佢仲話其實腦細對啲伙記真係好好咁話!至於叫人扮食家就去真米芝蓮,Katrina就話係腦細玩嘢之作,「腦細之前設計咗個『奶滋Lin』喺舖頭,想諷刺吓米芝蓮!其實都係想帶動到自己舖頭啫!」

之前嘅玩嘢餐單係「老味日報」。(老巷麻辣燙fb專頁圖片)

其實呢個「爆粗告示」夾咗喺個餐牌短短一星期,話咁快就俾網友po上網,有齊宣傳效果啦!仲有冇下一波?Katrina話:「其實今次都係想配合返個menu啫,腦細都諗咗好多唔同嘅餸名去惡搞吓㗎!可能下次都會再度過第二啲㗎!」今次位已出,玩gimmick係緊要,但係啲嘢食掂唔掂先係重點喎!

網友話「爆粗告示」條橋,「好難食牛肉麵」一早玩過!(網上圖片)

You may also like...

Leave a Reply

Your email address will not be published. Required fields are marked *