【樓上café打卡開餐 八哥陪食過聖誕】Hungry Pug

好快下個月就到聖誕,即係又有大餐食啦!有時候揀到間啱心水嘅樓上café,都可以有酒店質素㗎!好似尖沙咀Hungry Pug,以八哥做生招牌嘅呢間二千呎café,開業近半年吸引咗唔少OL同少女捧場打卡。本身養咗隻八哥嘅老闆兼大廚Terence,為咗今次嘅聖誕menu花咗唔少心思,有火雞肉食又有八哥佈置,限定平安夜同聖誕兩日推出,記得到時再去打卡喇!

老闆兼大廚Terence同老婆抱住心愛嘅八哥,一家四口好sweet啦!(被訪者提供照片)

聖誕套餐有兩款前菜俾客人選擇。分別係香煎焦糖鴨肝配砵酒汁金巴利火雞胸沙律。鴨肝醬汁用砵酒做成,而鴨肝表面燒咗層焦糖,食落脆卜卜!老闆話底層塊麵包可以吸油,食落會冇咁油膩。揀火雞胸肉食嘅,記得點埋個自家新鮮製嘅紅莓醬,味道好夾!

餐湯係法式海龍王湯配炭燒麵包。單係湯底已經用咗魚骨、龍蝦、蜆、青口同蝦殼等材料熬製而成;海鮮湯料亦啖啖肉分量十足,飲落鮮味濃郁呀,飲完都已經飽咗一半喇!

主菜有三款選擇。炭燒美國安格斯牛小排8oz。老闆選用咗美國安格斯牛,炭燒後再焗,出到嚟肉質又pink又鮮嫩,啱啱好五成熟,正呀!

除咗牛小排,另一款主菜係聖誕釀餡煙肉去骨春雞卷。用咗栗子同蘋果蓉餡釀春雞,再卷上煙肉煎完再焗,製作過程好花心機㗎!春雞卷有埋餡一齊食,味道甜甜哋好開胃,選用春雞唔用火雞,係因為春雞肉更嫩滑,一樣有聖誕氣氛啦!想食海鮮嘅,就可以揀海鮮慕絲焗魴魚柳,澳洲魴魚上面鋪咗蝦肉、魚肉,蝦油同蛋白而做成嘅海鮮慕絲,肉質嫩滑又鮮甜。

甜品係抹茶聖誕樹布朗尼配朱古力雪榚泡芙。聖誕樹係用蕃薯蓉加抹茶粉同糖而製成,最底個布朗尼就係合桃同朱古力味,細細件啱啱好,完美完結咗呢道聖誕餐!

聖誕menu每位HKD488配餐飲,中位價錢酒店質素又有八哥陪食,抵啦!

除咗聖誕menu,Hungry Pug最受歡迎嘅甜品就係超萌八哥栗子慕絲蛋糕HKD128。八哥像真度咁高,其實係栗子蓉加忌廉,口感綿滑、甜度又剛剛好,重點係用嚟打卡最啱啦!

 

Hungry Pug
地址:尖沙咀加連威老道29號信基商業中心2樓
電話:2345 6856
營業時間:星期一至日:11:30-23:00

You may also like...

Leave a Reply

Your email address will not be published. Required fields are marked *