【開幕率先試食 首創榴槤雪糕重口味?】日本雪糕物語

尖沙咀日本雪糕物語今日開張,小編打頭陣,幫你睇吓有咩必食雪糕啦!日本雪糕物語今次特別引入咗日本大熱嘅CREMIA系列雪糕,甜美水果系JAPAN PREMIUM清新水果雪糕同日本濃厚口味嘅NISSEI軟雪糕。除咗軟雪糕仲有熟食喎,玖子貴開埋喺舖內,食完鹹嘢再食甜品,掂晒!邊款最好食?即試!

打頭陣梗係香港首創金枕頭榴槤雪糕(HKD45)雖然表面淨係落咗啲榴槤粉,唔係成個都係榴槤雪糕。不過食到落口榴槤味都幾重喎!就算食完面嗰層粉,食到落尾啲雪糕都仲有陣榴槤味,唔會好似食原味咁,如果多啲粉就更好啦!

除咗榴槤,期間限定嘅金箔雪糕(HKD88)都好正喎,真係成張金箔放晒落去,唔怪得賣到咁貴啦!其實金箔係冇味嘅,得個樣,相機食先都夠啦!

JAPAN PREMIUM清新水果系列嚴選日本士多啤梨(HKD32),真係好清新!唔會話好死甜味道好假,食落啱好。唔想食咁濃味嘅雪糕,呢個啱晒!

至於日本濃厚口味嘅NISSEI軟雪糕,小編就試咗兩款睇得又食得嘅靚靚雪糕。皇牌朱古力配朱古力雞蛋仔餅(HKD39)食落朱古力味十分濃郁,仲帶點甘香,好好食喎,而且外面啲脆脆同雞蛋仔除咗係裝飾,食埋落肚都仲得㗎!

另一款皇牌朱古力×特選宇治抹茶配朱古力蝴蝶(HKD39),呢款完全冇得輸,小編最愛呀!抹茶味超級香濃,再加埋朱古力簡直雙重享受!最特別係佢出面啲脆脆原来係爆炸糖嚟 ,炸到小編心心眼囉!

講完甜品,佢嘅鹹食都正喎!店員推介釀北海道松葉蟹蓋(HKD58/件),用咗北海道松葉蟹肉同魚肉釀製,口感有啲似食緊獅子狗,食落真係有蟹肉喺入面!仲要係期間限定,想食就快手喇!

 

日本雪糕物語
地址:九龍尖沙咀金馬倫道8號地下
電話:2797 9967
營業時間:星期一至日:11:30-23:00

You may also like...

Leave a Reply

Your email address will not be published. Required fields are marked *