【米芝蓮睇中班戟小店 姐弟檔:冇諗過入圍】食焦

今年係米芝蓮港澳版十週年,上星期四喺澳門公佈得選名單,一二三星冇乜驚喜,反而街頭小食推介名單就有啲新鮮感,廿一個入圍食店,有三間新上榜,包括深水埗長龍食店文記車仔麵、元朗賣農場雞嘅Fork Eat同埋旺角嘅人氣甜品外賣店I Love You Dessert Bar

米芝蓮港澳版2018,上個星期四喺澳門公佈各入圍得主!為咗十週年,今次《米芝蓮指南香港澳門 2018》仲搵咗本地插畫師設計封面添!(米芝蓮指南網頁圖片)

姐弟檔拍住上開店賣日式疏乎厘班㦸,賣到被米芝蓮推介,家姐Karen同小編講:「完全冇諗過入圍,冇諗過會發生喺自己身上,依家心情仲係處於緊張狀態。今日(上星期四)收到好多恭賀電話!」Karen話事前冇任何「風聲」知道入圍,亦唔知米芝蓮點解會揀中I Love You Dessert Bar!「唔知佢哋個凖則,不過我哋一直嘅宗旨都係對食物嘅認真態度、用料新鮮,默默做好自己。」

以賣疏乎厘班㦸成功響朵嘅I Love You Dessert Bar,全靠打蛋白的技巧做出空氣感十足嘅班戟。(I Love You Dessert Bar fb專頁圖片)

有米芝蓮加持梗係開心,不過有人就覺得呢個係「死亡之吻」,因為有咗呢個光環,隨時俾業主瘋狂加租,做幾多生意都係假,之前添好運就係例子啦,今年街頭小食推介入圍嘅文記車仔麵老闆,接受傳媒訪問嗰陣都話好驚會俾業主加租!不過Karen就話唔諗得咁多,「一擔心就會影響心態,跟住就會影響埋食物質素,所以真係發生咗(加租)先去處理啦,依家做好自己唔好諗咁多!煮到嚟先食!」

I Love You Dessert Bar嘅姐弟檔組合,家姐Karen話完全冇諗過會俾米芝蓮揀中!(網上圖片)

定期會加入新口味轉吓menu,最平賣29蚊,大件夾抵食!(I Love You Dessert Bar fb專頁圖片)

其實I Love You Dessert Bar今年二月先開業,賣疏乎厘班戟之前,係賣漢堡包嘅!不過生意就唔係咁理想,再遇上員工忽然集體拉隊走人,Karen搞到要落閘停工,到二月才轉型賣班戟先殺出一條新路。「之前試過落閘交咗成四個月『吉租』㗎,後來轉做日式班戟慢慢先做出成績,所以依家真係得來不易!」

8月喺銅鑼灣開埋分店,算係站穩住腳,Karen就話暫時未諗再開新店計劃。(I Love You Dessert Bar fb專頁圖片)

都咗今年八月仲喺銅鑼灣開埋分店,總算叫上咗軌道發圍成功。依家有米芝蓮推介,咁有乜大計會唔會再開分店先?Karen話:「暫時未有打算呀,始終都會諗會唔會急得滯,依家呢個階段唔會不斷咁開(分店)!我哋生意人流一直穏定,依家繼續做好自己先!」係啦,唔好急,keep住食物質素,下年向星星米芝蓮進發啦!

今年米芝蓮指南嘅街頭小食推介,有三間食店新上榜,除咗I Love You Dessert Bar,仲有深水埗呢間人氣長龍店文記車仔麵。(網上圖片)

仲有以賣本地農場雞做賣點,位於元朗嘅Fork Eat。(Fork Eat fb專業圖片)

You may also like...

Leave a Reply

Your email address will not be published. Required fields are marked *