【深水埗超平燒味飯 單拼12蚊雙拼賣15咋】平霸

一向都知深水埗出名多平靚正嘢食,今次平霸小編出擊,親試兩大親民燒味飯,一盒雙拼燒味飯外賣價都只係15蚊,你冇睇錯喎,係15蚊呀!平到咁真係抵到爛喇!不過好唔好食,等小編話過你知!

唐順興燒味每日都有限定唔同嘅燒味飯,每個都只係賣12蚊!雖然星期一至六都係得單拼,不過星期日個雙拼飯都一樣係12蚊咋,平到笑呀!小編嗰日去到,見到有唔少街坊幫襯㗎,個個熟客仔感覺好鬼warm。小編嗰日外賣咗一盒脆皮燒肉飯(HKD12),唔好睇佢咁平,分量都好足料喎,飯多燒肉都多,唔會因為平就偷工減料;不過啲食落就「淋」咗啲,煲得唔夠乾身咁喎!燒肉方面就偏向肥豬肉多,好多脂肪呀!仲有,如果佢啲脆皮可以大嚿返少少就好啦!不過以12蚊呢個價錢,係好ok㗎喇!

唐順興燒味
地址:深水埗大南街293號地下
電話:2729 0339

食完唐順興燒味,去埋朗益燒味工房睇睇,小編一去到,眼見門口已經人山人海,心諗搞咩呀?原來個個排隊係為咗買佢哋嘅雙拼燒味飯。雖然同唐順興燒味一樣只限外賣,但係朗益燒味工房雙拼燒味飯(HKD15)只係賣15蚊就真係要試試啦!嗰日多人到要攞籌添呀,不過算等得好快,唔好俾佢個人潮嚇親呀!小編叫咗燒肉叉燒雙拼飯,打開個飯盒,啲餸都係full嘅,米飯粒粒分明。燒肉相比起唐順興,皮夠爽脆、燒肉肥瘦適中,堅好食喎!叉燒就全部都係瘦肉,雖然食落有啲硬,不過蜜汁夠晒味,15蚊好滿足呀!

平霸小評:雖然兩間都只限外賣,不過性價比都高㗎!小編就鍾意朗益燒味工房多啲啦,有得自選拼乜食,雙拼價仲要超抵!

朗益燒味工房
地址: 深水埗基隆街363-365號B舖
電話:2408 8867

You may also like...

Leave a Reply

Your email address will not be published. Required fields are marked *