【員工舖頭食肉被po上網 素食店老闆:俾人公審】食焦

上星期又有單網料好熱閙,事緣係喺一個素食群組入面,有人po咗段文,內容話喺間素食餐廳度,見到啲員工食飯,有幾奇?奇在係食肉,仲要又牛腩又豬手,食到成枱係骨,po文呢位素食女士話「對5住我真係接受唔到」!佢個po雖然冇影到嗰幾位食肉員工,但就tag咗間素食餐廳同放咗佢哋嘅餐牌出嚟!

就係呢個po喇!見到素食店員工食牛腩又豬手,搞到佢「接受唔到」!(素食青年群組截圖)

事發素食小店Veggle Cafe,老闆話間舖得二百呎,員工難免有時會喺店入面食飯!至於食肉定素?好難控制喎!(Veggle Cafe fb專頁圖片)

跟住係點?梗係素食同肉食兩邊開戰啦,有人話呢間舖頭唔係第一次,老闆試過收咗工煮肉;又有人撐素食店,話素食L連人食啲乜都要管都要關佢哋事!至於間素食店就係觀塘嘅Veegle Cafe,小編搵咗老闆葉生,佢就還原咗當日嘅情況。「嗰日下午放飯,啲員工買咗隔離啲飯盒,嗰時又多人,佢哋就喺舖頭度食。我知道係有位兩位太太見到呢個情形,到咗夜晚我就見到網上po咗出嚟,話我啲員工食肉!」

Veggle Cafe嘅冷麵沙律,燒雜菇配日式芝麻醬!呢碟一定係素啦!(Veggle Cafe fb專頁圖片)

素食店老闆就喺自己面書度話覺得俾人網上公審!(網上截圖)

老闆話當時的確「少少嬲」!「其實嗰位太太如果真係咁反感,其實係有足夠時間可以同我講,如果佢當時同我講,我會叫啲員工去第二度食!唔使依家好似變咗網上公審咁!」本身都唔係食素嘅老闆仲話,佢控制唔到啲員工食乜,佢亦覺得今次事件對佢員工亦唔公平。「我口中係有班『偏激素食塔利班』,佢哋係好唔體諒人,其實佢哋自己本身素食者都分好多派,呢班偏激素食人好多時都好極端。」

仲有素甜品!成間素食店嘅出品都係老闆親自下廚,佢話都係想盡心俾素食人士食到好味素食,唔加牛奶唔加蛋,真係全素!(Veggle Cafe fb專頁圖片)

掀起網上兩幫爭論,老闆話網上世界「唔理得咁多,等佢自己收科」不過就覺得無端端俾人網上公審就好反感囉!「好似我唔舒服坐咗關愛座,但俾人影咗相就話我唔讓座一樣囉!」其實員工放飯時間食肉啫,又唔係素食舖忽然變賣肉,放鬆啲啦,大家!

素食派同肉食派各有各講!(網上截圖)

You may also like...

Leave a Reply

Your email address will not be published. Required fields are marked *