【十蚊小丸子冇呃秤 5球迷你雪糕一肚氣】平霸

平霸食乜好?今次同大家介紹兩間喺西九龍中心開咗好多年都屹立不倒嘅老店。兩間啲小食10蚊就可以食到,咁鬼平,等小編又出動,睇吓平嘢係咪真係冇好嘢啦!

French Corner位於西九龍中心八樓,同其他食店相比似乎得佢一間專買小食,今次小編叫咗章魚小丸子(HKD10);呢個雖然係細size,但都有成四粒㗎,賣相幾靚仔;紫菜、醬汁乜都有齊晒,新鮮熱辣辣。食到落口,粉漿都唔算重喎,不過就偏空心,好在每粒入面都有返粒章魚粒,算冇呃秤啦!食完章魚小丸子仲有啲口痕?可以叫埋佢個比利時窩夫(HKD10)窩夫有八種口味咁多,小編就點咗牛奶花生醬味,食落唔會好甜;不過佢哋嘅窩夫係整好咗之後再翻熱,食落味道爭啲啦。入面啲質感好似蛋糕mix鬆糕咁,食到最尾會好口乾,認真麻麻!

French Corner
地址:深水埗欽州街37號西九龍中心8樓美食廣場8F13號舖
電話:2430 9892

K&H雪糕店呢間不得之了!唔係好到一個點,而係差到一個點!先講服務態度,女店員態度十分之差不特止,仲要超級無禮貌!嗰日小編去到,完全唔會主動招呼客人,去到點嘢食,佢就話要上去拎啲嘢,要等十分鐘。其實半個鐘之前小編已經問過佢,嗰時就話雪糕未準備好,要等十分鐘;到第二次,依然都係要等,仲要一句唔好意思都冇!已經俾小編一個超差嘅印象。講返正題,叫咗佢嘅迷你雪糕5球(HKD10),留意返其實唔係隻隻味都係10蚊㗎,榴槤、乳酪同益力多係要再加錢嘅!小編叫咗海鹽、綠茶、薄荷朱古力、薄脆曲奇同豆腐。除咗豆腐有啲驚喜之外,其他都係好重膠味,驚嚇多啲囉!食食吓仲要喺雪糕入面食到有條頭髮,小編表示呢間永遠黑名單呀!

K & H 懷舊食品
地址:深水埗欽州街37號西九龍中心5樓5K167-168號舖
營業時間:星期一至日:12:00-22:00

平霸小評:其實食嘢除咗要味道好,服務都要包埋喺入面,如果好似K&H呢間咁,真係劣評之選呀!

You may also like...

Leave a Reply

Your email address will not be published. Required fields are marked *