【准食客自帶火鍋料 台灣海底撈俾埋冰盤】食焦

過埋呢個星期,話咁快就要拜拜2017喇!講到今年嘅飲食界大事,點都唔可以少咗海底撈進攻香港,十月開咗第一間分店啦,你食咗未呢?香港暫時得一間,但喺台灣就已經有5間分店喇,臨近年尾,最近仲爆咗單大消息,就係台灣海底撈喺facebook專頁度公告,開放俾食客自帶任何食品同酒水,係任何呀!即係連火鍋料都唔拘,仲唔會加收任何費用添!

台灣海底撈最近喺自家facebook專頁內公告,包廂唔設最低消費外,仲話開放俾食客自攜食物酒水,不另收費!(台灣海底撈facebook專頁圖片)

一出po,梗係有人like有人愁!網友同食客們當然激讚,個個留言話要即刻帶嘢食去實測;嬲豬嘅就係邊爐界嘅同行們,話海底撈咁做真係「破壞行規」、「想做爛個市咩」!唔理咁多,呢個星期真係有唔少人睇完個公告之後,就即刻行動去海底撈試吓堅定流!

網友買料實測,肥牛一大份,去到店員好熱心上碟,鋪埋冰添呀!(Costco好市多商品經驗老實說fb專頁圖片)

有網友真係買咗唔少火鍋料去實測喇,有乜呢?有好大分量嘅肥牛啦、帆立貝啦,同埋唔少菇類蔬菜!結果點呢?據網友嘅形容係,店員見到完全冇任何驚訝,反而仲問網友需唔需要幫手用碟放好啲火鍋料,又問佢啲菇菇要唔要洗洗佢。睇返網友po出嚟嘅相,就見到啲肥牛唔止用碟裝好晒,仲細心到有埋冰鋪底,啲帆立貝更加用冰盤擺到靚一靚添!其他網友見到就留言大讚,話海底撈服務真係一流又細心喎!

幫你洗埋啲菇菇,用個靚冰盤裝住啲帆立貝!靚到呢!(Costco好市多商品經驗老實說fb專頁圖片)

有樣學樣,個個都自帶食物酒水去海底撈,有網友仲買埋原隻龍蝦去食,夾埋其他配料,用咗千一蚊台幣,即係唔使三百蚊港銀,就咁一餐計,去海底撈就淨係俾咗個火鍋湯底料,二百六台幣,即係六十零蚊港銀搞掂!自帶食物條數,同喺舖頭點火鍋料邊樣抵?真係要自己計清楚喇!

有另一位網友自備埋龍蝦開餐,埋單只係俾咗湯底錢二百六台幣,七十蚊港銀都唔使!(海霸威食遊影記網頁圖片)

開埋香檳,不另收服務費喎!(海霸威食遊影記網頁圖片)

台灣海底撈呢個「創舉」,引來唔少人談論,佢哋嘅發言人就話唔係想破壞行規,其實只係參考大陸海底撈做法啫,仲話喺大陸嘅分店好多都係開放俾食客自帶食物!大陸同台灣係咁,咁香港分店又點呢?小編問咗香港海底撈,店員話可以自帶其他食物,不過火鍋料就因為衛生安全問題,係唔可以嘅!想學台灣網友咁買晒肥牛龍蝦入去食?唔得啦!不過話時話,唔點海底撈嘅火鍋料食,咁去嚟又為乜呢?

香港海底撈分店得唔得?店員就話帶食物酒水係可以,不過火鍋料就唔得喇!(海底撈香港fb專頁圖片)

You may also like...

Leave a Reply

Your email address will not be published. Required fields are marked *