【日韓魚肉腸大比併 檸檬芝士似食洗潔精】伏務台

唔知由幾時開始,小編嘅行街路線都離唔開零食舖同便利店,今次又俾我成功搵到伏嘢喇!講到好似好開心咁,不過言歸正傳,呢期好似都有幾多唔同款嘅魚肉腸,搞到小編心郁郁又想試吓,今次就揀咗3款嚟自日韓嘅朋友,一齊睇吓邊款最伏啦!排名由最唔伏嘅講起。

Jinju吞拿魚夾心魚肉腸 HKD10

呢個吞拿魚腸小編本身都抱住幾大期望吓,不過食到落口就有少少失望。個人覺得佢嘅芝士同吞拿魚有啲唔夾,好似做多咗咁,雖然都有吞拿魚味,不過入面有啲散,食落有少少奇怪咁喎。

東洋水產芝士煙燻魚肉腸-黑椒香蒜 HKD16.9/2pcs

見佢寫住有煙燻咁巴閉,就試吓你咩料!食落口,就真係得黑椒味,仲要係好重口味嗰隻添,完全蓋過晒蒜蓉同芝士味,而且一啲煙燻味都無喎!不如直接話係黑椒腸仲好啦,除咗黑椒,小編什麼也吃不到呀!

善字檸檬芝士魚肉腸 HKD19.8/5pcs

重頭戲嚟啦!呢個真係超!級!爆!炸!難食呀!本身檸檬同芝士放落甜品度照理都幾夾啩,但主角一變咗魚肉腸,真係咪玩啦,唔好咁浪費食物好喎!個味道好似食緊柔順劑同洗潔精咁(似咋,小編實在冇食過柔順劑同洗潔精嘅!)極之奇怪,請我都唔食呀!

 

小編伏氣:今次一口氣食咗三款腸腸,其實全部都係防腐劑嚟,有時候都係唔好亂咁試新嘢,中硬伏呀!特別係檸檬芝士魚肉腸,玩咩大懲罰食佢就啱架喇!

入伏點:優品360、759阿信屋
入伏價:Jinju吞拿魚夾心魚肉腸 HKD10;東洋水產芝士煙燻魚肉腸-黑椒香蒜 HKD16.9/2pcs;善宇檸檬芝士魚肉腸 HKD19.8/5pcs;

中伏by #愛吃的旅人
美術by #Mui Mui
攝影by #愛吃的旅人

《伏務台》星期一伏務大眾,歡迎各界報料。

You may also like...

Leave a Reply

Your email address will not be published. Required fields are marked *