【強國麥記推早餐賣粥 網民最期待真.麥牛河】食焦

強國麥記金拱門有新嘢出呀!今次係出粥,上星期推出咗新廣告宣傳,睇見咁多殘體字就梗係冇乜美感可言啦,至於啲粥,今次硬sell嘅有三款,就係酸菜脆筍雞肉粥、皮蛋雞肉粥同埋鹹蛋黄雞絲粥,全部都係雞!由依家開始到3月底供應,賣六蚊人仔起仲可以加埋個薯餅,點解唔學大陸KFC出埋油炸鬼啫?

大陸M記依家早餐有粥食,不過三款都係雞粥底,六蚊人仔仲想點?(麥當勞中國網上圖片)

今次強國麥記推呢個粥王系列,除咗有廣告相仲有埋片,咁邊個係粥王呢?其中一位仲係香港粥王李景,縱橫粥界四十幾年,退咗休再出山開舖,依家喺鰂魚涌主理「粥麵館」,廣告片入面幾位粥王仲講晒秘訣,要用東北大米啦、12:1黄金水米比例啦、仲要慢熬95分鐘煮到開花。

廣告搵咗三大粥王,兩位來自中國,企正中間嘅係香港粥王李景!諗諗吓,其實都可以搵鼎爺吖!(麥當勞中國網上圖片)

Chef Le Mon變身麥記星廚賣包,只限強國期間限定,香港無份!(麥當勞中國網上圖片)

搵香港飲食名人拍片唔係第一次,當然最有印象梗係Chef Le Mon,上年九月幫強國麥記賣包,宣傳星廚系列,chok到呢,不過嗰陣未有摩打手唧醬啫!講返個粥,其實麥記賣粥亦唔係新鮮事喇,之前喺馬來西亞原来已推出過麥麥粥㗎喇,仲係全球第一間賣粥麥記添!

馬來西亞先係第一間賣粥嘅麥記。(網上圖片)

網民睇見呢個強國麥記粥嘅廣告,當然最關心係問「幾時有麥牛河?」!話說麥牛河呢個傳說,其實耐唔時都會俾人拎返出嚟講,最早係因為有網民向2004年參選立法會的中文大學生物化學系客席教授曹宏威挑戰,喺網上問佢:「點解m記冇牛河賣?」曹博士就回應:「因為你去錯地方。」於是曹博士就俾網民封為「牛河博士」同瘋狂改佢圖!到咗前年又傳到真嘅一樣有麥牛河,仲P晒圖成個廣告咁款,成為網民最期待嘅麥記食品!未有牛河食之前,粥你想唔想食?

會唔會有真嘅一日呀?(網上截圖)

P到真嘅一樣,不過麥牛河始終都只係一個都市傳說!(網上圖片)

瘋狂改圖牛河博士!(網上圖片)

You may also like...

Leave a Reply

Your email address will not be published. Required fields are marked *