【子宮虛寒要調養 3大種類食物逐級暖】懶健康貼士

有啲女士連夏天都要飲熱飲,其實未必係關養生事㗎,可能只係子宮太虛,要時時刻刻都要保暖咋。到咗冬天更加唔使講,手腳凍到飛天之餘,M痛仲好似大病纏身咁,想瞓一覺好嘅都難。

子宮係女人天生好拍擋,梗係要好好調養啦。唔同體質可以食嘅嘢都唔同,以下簡介咗三種Level嘅暖宮食物俾大家參考,有需要就向你嘅家庭醫生詳細查詢啦。

 

平性食物

比較平和,相對於寒涼同溫熱之間嘅食物,寒熱性質都唔明顯。

香菇有「山珍之王」嘅美譽,有高蛋白質又低脂,係幾好嘅營養保健品。

黑木耳有吸附能力,對清腸胃同消化纖維素有幫助。黑木耳經常用喺各款中西菜式,例如同紅棗、蓮子加糖燉熟,潤喉強身。

毛豆即係新鮮連莢嘅黃豆,曬乾之後就係大豆,佢嘅纖維含量比芹菜更加高添。

魷魚含鈣、磷同鐵,對骨骼發育同造血有幫助,容易貧血嘅女士可以食多啲,不過注意膽固醇攝取過量呀。

 

溫性食物

指性溫嘅食物,有溫補嘅功效。

蕃薯營養齊全而豐富,有蛋白質、磷、鈣、鉀、胡蘿蔔素、維他命A、維他命C、維他命E、維他命B1、維他命B2等等。佢飽肚感強勁,好多人減肥都會食。

牛肉喺中醫角度有暖胃作用、補中益氣、滋養脾胃、強健筋骨等功能。中氣不足、體虛同貧血嘅人應多食肉。

洋蔥係少有含前列腺素A嘅蔬菜,可以擴張血管、降低血液黏度、降血壓同預防血栓形成。

水蜜桃可以美肌同清胃潤肺。佢嘅蛋白質含量比蘋果、葡萄高一倍,比梨子高七倍,鐵的含量比蘋果多三倍,比梨子多五倍,含多種維生素,其中維生素C最高。

 

熱性食物

可以減輕同消除寒症嘅食物稱為熱性食物。

中醫會用韭菜種子同葉入藥,可以健胃補腎,煮菜耐不耐食吓又可以增加餸菜香味。

羊肉最啱冬天食,係冬季補品,可以禦風寒同補身,對一般風寒咳嗽、慢性氣管炎、虛寒哮喘、腹部冷痛、體虛怕冷都有幫助。

好多甜品都有加肉桂,可以暖脾胃、除積冷、通血脈,能夠改善手腳冰冷嘅情況。

咖喱主要用薑黃粉、川花椒、八角、胡椒、桂皮、丁香等辣味香料調配,可以促進血液迴圈,亦可以改善便秘情況㗎。

You may also like...

Leave a Reply

Your email address will not be published. Required fields are marked *