【台版「深水埗明哥」大愛 餘廚加料送暖流浪漢】食焦

唔好咁多怨氣喇!睇多啲好人好事,有時候個心都會暖啲㗎!香港有「深水埗明哥」派飯送暖,直頭係正能量代表,喺台灣都有個「明哥」翻版,一樣係暖男典範,最近俾台灣傳媒同網友讚爆!話說喺台中有間意大利餐廳「Dona多納pasta」,老闆兼大廚嘅呢位何宇淨先生,就為餐廳附近嘅流浪漢同露宿者街友,送上愛心便當。

32歲嘅淨哥開咗自家義大利餐廳,收咗工都一樣為流浪漢煮愛心便當,暖男無誤啦!(facebook圖片)

整好最多十份便當,就放低喺變電箱上面等流浪漢嚟攞,淨哥話唔使親手送嘅,「不打擾的愛心就是尊重!」。收到!(聯合新聞網圖片)

每當深夜時分,喺台中公園附近街邊嘅變電箱上面,總會發現大概有十份包裝整齊嘅便當,就係由愛心大廚阿淨哥包辦。喺佢自家意大利餐廳打烊之後,淨哥都未收得工,佢會將當晚餐廳嘅餘廚,再加料炮製,好似上個星期寒風來襲,佢會將雞髀加米酒,整返味燒酒雞;又會用餐廳嘅蝦高湯熬生米煮粥,再加入皮蛋,真係食到暖笠笠。

用得唔好嘥,蝦高湯嚟熬粥加皮蛋再加無限嘅愛心,寒風天飲一碗,暖上加暖呀!(facebook圖片)

之前冬至,淨哥加足料整咗客家鹹湯圓加粉絲,超有心應節!(facebook圖片)

寒冬嗰時就煮熱粥整米酒燒雞,又好似近幾日天氣暖返啲喇,淨哥就會煮茄汁鯖魚雞蛋麵,連唔同天氣溫度啱食啲乜,佢都諗好埋,真係超細心!煮好晒之後佢就會整成便當,有埋餐具set好晒,一份份咁擺喺餐廳對面街邊嘅變電箱度,等流浪漢自己嚟攞。

仲有芋頭粉絲湯,夠晒溫暖又飽肚!(facebook圖片)

身為意大利餐廳老闆兼大廚,但係淨哥就唔會送西餐,因為佢話班流浪漢街友都係鍾意食中式,古早味嘅嘢喎!連呢樣都照顧埋,好貼心啫!(facebook圖片)

呢個舉動俾台灣嘅網友大讚感動,話淨哥送暖係台灣最美的風景添。今年32歲嘅淨哥,由洗碗出身做到大廚,舊年終於做老闆開埋餐廳,佢接受台灣傳媒訪問嗰時話,知道餐廳附近試過有流浪漢乞食情況,佢話知道每個人都有尊嚴,所以佢通常放低便當就轉身走人,佢話:「不必看見誰拿了食物,不必親手發放,不打擾的愛心就是尊重」。淨哥上個星期就喺fb度po咗段文,「9點送出奉食……剛剛10點去偷瞄一下……沒了!6盒炒飯&14碗雞湯都沒了!!!」呢份大廚愛心餐,好窩心呀!

雖然話「不打擾的愛心就是尊重!」,但係淨哥有時都會偷偷留意,好似呢日咁,6碗炒飯同14碗雞湯,清場了!(facebook圖片)

台灣網友大讚淨哥善舉令人感動!睇吓台灣人用字幾咁文雅!(facebook截圖)

You may also like...

Leave a Reply

Your email address will not be published. Required fields are marked *