【旺角街頭邊樣最好賣? 5大人氣小食爭霸戰】和藏桂林夜市、新台場台灣小食、am.pm、Smuki、金蛋爆漿玉子燒

喺相機食先嘅年代,鍾意掃街嘅人只要隨意掃吓部手機都可以搵到人氣美食。不過相機好食啫,最後都要把口話好食先得嘅,等Mui Mui去旺角實試,睇吓呢5間人氣食店嘅招牌係咪真係網上流傳咁得先!

港式

本土小食唔係得咖喱魚蛋,避風塘風味都好受歡迎㗎,和藏桂林夜市就做咗個避風塘魷魚鬚喇!

日賣二千幾份嘅避風塘魷魚鬚(HKD27)點解咁正?因為佢將避風塘風味嘅精髓炸蒜蓉整得香脆可口,有少少辣勁,愈食就愈停唔到口;魷魚鬚都炸得同樣香脆又保持到韌勁,最重要炸粉超薄呀!一個人食可能熱氣啲,兩個人食一份都唔錯。

 

和藏桂林夜市
地址:旺角登打士街55號地下6號鋪
電話:2399 0828
營業時間:星期一至日:11:00-23:00

 

台式

去得台灣都必食芋圓,雖然香港冇夜市,但可以去新台場台灣小食尋味!

綜合三色有餡芋圓(HKD28)嘅糖水微甜唔膩,分量唔會浸晒成碗。芋圓口感Q彈,幾似台灣食到嘅質素;驚喜嘅係裡面有蕃薯蓉餡料添!如果同Mui Mui一樣鍾意糯米食品,呢樣一定停唔到口!話明叫綜合,當然仲有其他料啦。紅豆蓉豆香味出,仲有涼粉同綠色嘅果凍,細個嘅回憶返晒嚟!呢碗芋圓飽感十足,仲凍熱兩食,一年365日都啱食。

 

新台場台灣小食
地址:旺角廣華街1號仁安大廈地下24A舖
電話:2885 3080
營業時間:星期一至四:12:30-21:30;星期五至日及公眾假期:12:30-22:00

 

另一間舖頭金蛋爆漿玉子燒出名嘅梗係玉子燒啦,佢喺台灣夜市開到過嚟香港,慰藉蛋控嘅心!

呢度嘅明太子玉子燒(HKD32)好有台灣風味,因為大部分食材同醬汁都嚟自台灣。台灣嘅明太子味道鹹得嚟幾鮮味,配上沙律醬同海苔又即刻變返和風感覺。舖頭堅持即叫即造,蛋卷上手必定熱辣辣,蛋唔會全熟,食到香滑蛋汁;裡面捲咗好多粟米、芝士同魚卵,咬開有啲拉絲效果,絕對足料唔吝嗇!

 

金蛋爆漿玉子燒
地址:旺角登打士街43號B舖
電話:9620 4202
營業時間:星期一至日:12:00-00:00

 

日式

日式甜品經常令一眾少女心大爆發,梳乎厘經過時日洗禮都仲係大家嘅至愛之一。am.pm雖然有賣雞蛋仔呢啲港式小食,但佢哋嘅炎燒布丁梳乎厘都好出名!

炎燒布丁梳乎厘(HKD48)每日限定30份,手快有,手慢冇。梳乎厘麵糊漿打得厚實挺身,燒完之後都仲Keep到空氣感,又唔會一出嚟就即刻塌。咬落口感幾實在,唔會一陣風好似咩都冇食過。梳乎厘Pancake面層淋咗布丁漿,再灑上砂糖去燒,食落有3種口感:上層嘅焦糖好香脆,中間係濕潤嘅布丁層同埋鬆軟嘅pancake底,配埋自家製3.7牛乳製嘅雪糕,特別香濃順滑。不過餓底可能辛苦啲,因為佢即叫即煎,多人嘅時候真係要等半個鐘先有得食。

 

am.pm
地址:油麻地彌敦道560號譽發廣場地下B舖
電話:2725 4318
營業時間:星期一至日:12:00-22:00

 

 

法式

要做高貴Lady都可以掃街嘅,食Smuki嘅法式小食咪瞬間變身囉。

法國臻品奶脆(HKD20)泡芙條喺店內新鮮焗製,離遠已經聞到陣陣香氣!泡芙條充滿牛油香氣,仲鋪滿杏仁粒增添口感。咬開即刻爆出滿滿微凍嘅吉士餡,奶味香濃,外脆內滑嘅口感真係一試難忘。

 

Smuki
地址:旺角西洋菜南街60號地下3號舖
電話:2556 2300
營業時間:星期一至日:10:00-23:00

 

小編平時鍾意鹹食多少少,所以呢5間人氣食店之中,小編大愛金蛋爆漿玉子燒嘅玉子燒,火喉恰到好處又多料,對得住佢嘅價錢。其他食店嘅小食都好出色同花心機,唔怪得佢哋係網路大熱!

You may also like...

Leave a Reply

Your email address will not be published. Required fields are marked *