【11個人茶水計14萬9 翠園食飯埋單天價16萬】食焦

有冇諗過去間普通酒樓食餐飯,埋單食咗成16萬?唔係講笑喎,有圖有真相,呢幾日網上流傳一張驚人單據,睇到個個都O晒嘴!話說有網友喺「TAI PO大埔」群組度,po咗一張翠園酒家嘅晚飯單據,埋單銀碼係HKD167,565.2!係咪嚇死人?睇返只得11個人嘅晚餐,但係茶錢竟然係計咗9999人,淨係茶水錢都要HKD149,985,全張單嘅價錢盛惠16萬7千幾囉!

有單有據,斷估都唔會係惡搞啩?係上星期二晚市時段,網友冇交代詳情,只係寫咗句「要開8百幾圍先坐得晒喎」!一餐飯埋單16萬7,都算經典!(TAI PO大埔群組圖片)

呢位網友只係po咗句「要開8百幾圍先坐得晒喎」再加張單據相,就冇再交待任何嘢喇!識睇梗係睇留言啦,「去咗紅磡香港體育館飲茶,成萬人啊」、「我比較想知佢地(哋)係咪真係有9千幾隻杯多D」、「咁都夠膽比(俾)張單個客嗰下型喎」……

翠園係美心集團旗下嘅,回應傳媒就話餐廳已經即時修正喎!出咗咁嘅單,唔修正唔得啦,邊會有客肯俾呢筆數呀?(網上圖片)

張單就好明顯係翠園張單,但係咪出自大埔太和嗰間呢,就真係唔知喇!不過翠園所屬嘅美心集團,就有回應到呢件事喎!有發言人答咗傳媒,確認咗係真有其事,但係酒家已經即時修正有關單據嘅資料,同埋已經向員工重申正確程序咁話喎!出錯單搞出張「天價」收據,其實check單呢樣嘢,唔止食客要睇真啲,出單嗰位都要留心吓,唔好搞出大笑話啦!

網友反應熱烈,9999個人,真係要去紅館食先得喎!(TAI PO大埔群組截圖)

呢單嘢似乎確係手民之誤成份居多嘅,咁擺到明有心劏客又係點呢?呢排咁啱都有黑店上榜喎!話說有4個喺意大利留學嘅日本留學生,去咗威尼斯嘅Osteria da Luca餐廳食飯,只係點咗3份牛扒、1份炸魚同幾杯清水,埋單就要過千歐元,圍起過萬港銀,4位㗎仔梗係唔會做傻仔啦,當場報警!而呢間餐廳一直喺網上臭朵,俾網民一早數到成地負皮㗎喇!

威尼斯劏客黑店,網上一致劣評!(網上圖片)

威尼斯遠咗啲,但係港人旅遊熱點嘅泰國曼谷都一樣中招,好似最近就有位泰國網民因為被店主誤認為係中國人,又被劏喇!佢喺夜市食餐飯啫,叫咗碗羅勒脆皮豬肉飯同隻荷包蛋,雖然埋單只係四十蚊,但已經比平時食貴咗一倍喇,可想而知係點樣劏遊客啦!所以都係嗰句啦,check單check單check單啦!

食碗豬肉碟頭飯,比平時貴咗一倍!(網上圖片)

呢位泰女真係咁似強國人咩?俾人咁劏法,唔抵啦!(微博圖片)

You may also like...

Leave a Reply

Your email address will not be published. Required fields are marked *