【砂窩雲吞雞唔使出街食 豆漿幫你煮出正宗味】mui mui家政課
Mui Mui由細到大都好鍾意食砂窩雲吞雞，貪佢有菜有肉之餘，仲可以飲埋佢個奶白色嘅精華湯，飲完即刻覺得滋潤晒！不過依家有得食呢道菜嘅餐館唔多，價錢仲要唔平！Mui Mui千方百計下終於研究出簡易食譜！做法簡單、材料又唔貴，重點係落啱食材就成功令湯底都變埋奶白色添！無論懶人定新手都要收藏呢個食譜啦！
材料與分量：
- 雞髀 – 2隻
- 金華火腿 – 2片
- 紹菜 – 1棵 (白菜仔，娃娃菜都得)
- 雲吞 – 12粒
- 無糖豆漿 – 300毫升
- 鹽 – 適量
做法：
1. 煲滾熱水，下金華火腿及雞髀出水備用。
2. 紹菜洗淨後切段成約5CM長備用。
3. 準備另一個乾淨鍋，倒入水，滾起後下已出水的金華火腿及雞髀大滾半小時，轉中細火再慢煮1小時，下少許鹽調味。
4.下紹菜，細火煮15分鐘，之後再下豆漿，若喜歡更香奶味可自行增加豆漿分量。
====以下步驟可於上桌前才進行====
5.下雲吞，轉大火滾起，雲吞熟就可以熄火完成。
mui mui小Tips
– 要令湯底變奶白色，就一定要落豆漿。
– 豆漿一定要選無糖，先唔會遮蓋雞湯嘅清甜味。
