【十大致肥賀年食品 卡路里排行榜大檢閱】懶健康貼士

新年堪稱肥美節之首,好多人都唔介意食多啲應節,但係成個新春咁長日子,冇人想返工俾人話肥咗嘅!想知道咩嘢食物最致肥之前,不如睇睇你一日可以攝幾多卡路里先啦:

資料來源:衞生署學生健康服務

 

大家Mark低自己可以食幾多,我哋就進入肥食倒數喇!

 

第十位

糖蓮子(17卡路里/一粒)係最細Size,咁佢排最後都好應該。

第九位

糖冬瓜(37卡路里/一件)係小編最愛,好彩佢排第九,仲可以食多幾件。

第八位

糖蓮藕(50卡路里/一片)大片啲,感覺冇糖冬瓜咁甜,但係食晒糖蓮子、糖冬瓜同糖蓮藕,卡路里唔爆標都糖份爆標,糖尿病人士一定要忍口呀!

第七位

笑口棗(55卡路里/一粒)雖然炸過,但冇餡料救咗大家一命先。

第六位

油角(130卡路里/一件)有糖、花生碎、芝麻同椰絲做餡已經好肥?仲有個皮都唔嘢少㗎!要落豬油搓皮先甘香,細個見媽媽搓完皮要洗好耐先還原返個廚房。

第五位

煎蘿蔔糕(130卡路里/100克)會肥就大家都知,但提提大家,依家嘅蘿蔔糕標榜勁多料,相對會愈肥囉。

第四位

煎馬蹄糕(140卡路里/100克)真係估佢唔到可以爬蘿蔔糕頭,其實咁清甜嘅糕點又做咩要煎呢?蒸咪冇咁油囉!

第三位

蒸年糕(156卡路里/100克)主料係糯米粉、椰汁、蔗糖同片糖,呢個無敵高糖組合真係幫你提供勁高卡路里。佢蒸都高卡過煎蘿蔔糕,大家為健康著想煎嘅就食少兩件啦。

第二位

成日話「煎堆碌碌,金銀滿屋」,呢款意頭食品就算平時唔食,但新年必食。點解咬個小煎堆(250卡路里/一個)都已經成口油?佢主料係糯米粉,炸嘅時候勁吸油㗎,真係一個起兩個止好喇。

第一位

紅、黑瓜子(567卡路里/100克)係全盒嘅膽,寓意「搲銀」,好易傾陣偈就去消滅一堆!紅、黑瓜子以西瓜子製,經鹽、油等醃料加工,鹽分較高。黑瓜子更加以醬油炒製,鹽分除咗黏喺外殼亦會滲入瓜子,鈉質非常高!

 

講完一輪好似樣樣都唔係極高卡路里?你只要跟上面嘅分量,每樣食一份就已經有1532卡路里,佔一位成年女性每日所需卡路里60%左右,一位成年男性每日所需卡路里50%左右!仲有大大小小嘅聚餐要食呢,都咪話唔嚇人,究竟邊啲要食少啲大家計計喇!

您也許也會喜歡…

發表迴響

你的電子郵件位址並不會被公開。 必要欄位標記為 *