【KFC櫻花脆雞櫻喺邊? 又鹹又甜超難食】伏務台

最近KFC又出新品,唔知係咪想食住個勢,趁嚟緊春天,竟然出個櫻花脆雞,小編一聽都O咗嘴。睇見連唔少網民都話:「櫻花味粉=伏、食左(咗)都完全唔知咩味,好難食等等……」講到咁,小編又要出動喇,即刻幫大家試吓係咪真係咁伏啦!

KFC新品櫻花脆雞(HKD42)

呢個價錢嚟講都算正常嘅,但就咁睇,真係睇唔出係櫻花炸雞喇。似係普通炸雞再灑咗啲粉紅色粉落去多啲喎。聞落都係得炸雞味,何來花香?不如改過個名,叫櫻花粉脆雞會唔會好啲呀?

口感方面,老實講係得層皮先有味,仲要係又鹹又甜,怪怪哋唔係好食嗰隻囉!真係一啲花味都食唔到喎,何來櫻花脆雞?同埋今次個皮好似都唔同啲,雖然冇炸燶到,不過就真係食完都唔知自己食緊啲咩,好虛無呀!同事都話,見到呢款櫻花脆雞,都係寧願叫返原味穩陣啲,唔敢試呢個呀!

小編伏氣:學網民話齋,真係食完呢個櫻花脆雞都唔知自己食咗啲咩落肚呀。小編表示黑人問號,係咪最近KFC冇乜伏嘢出過,唔通要出返個櫻花脆雞伏吓大家?

入伏點:KFC

中伏by #愛吃的旅人
美術by #Mui Mui
攝影by #文蝦

《伏務台》星期一伏務大眾,歡迎各界報料。

You may also like...

Leave a Reply

Your email address will not be published. Required fields are marked *